തെരഞ്ഞെടുപ്പ് തീയതി ഇന്ന് വൈകിട്ട് നാലിന് പ്രഖ്യാപിക്കാനിരിക്കെ തെരഞ്ഞെടുപ്പ് പെരുമാറ്റച്ചട്ടം മുന്നിൽ കണ്ട് ഉദ്ഘാടനം നേരത്തെയാക്കി ആരോഗ്യമന്ത്രി വീണ ജോര്ജ്. ഇന്ന് വൈകിട്ട് അഞ്ചിന് തീരുമാനിച്ചിരുന്ന കോഴഞ്ചേരി പാലം അപ്രോച്ച് റോഡിന്റെ ഉദ്ഘാടനമാണ് വൈകിട്ട് മൂന്നുമണിയിലേക്ക് മാറ്റിയത്.
പത്തനംതിട്ട: തെരഞ്ഞെടുപ്പ് തീയതി ഇന്ന് വൈകിട്ട് നാലിന് പ്രഖ്യാപിക്കാനിരിക്കെ തെരഞ്ഞെടുപ്പ് പെരുമാറ്റച്ചട്ടം മുന്നിൽ കണ്ട് ഉദ്ഘാടനം നേരത്തെയാക്കി ആരോഗ്യമന്ത്രി വീണ ജോര്ജ്. ഇന്ന് വൈകിട്ട് അഞ്ചിന് തീരുമാനിച്ചിരുന്ന കോഴഞ്ചേരി പാലം അപ്രോച്ച് റോഡിന്റെ ഉദ്ഘാടനമാണ് വൈകിട്ട് മൂന്നുമണിയിലേക്ക് മാറ്റിയത്. അതേസമയം, പാലമാണോ അപ്രോച്ച് റോഡാണോ എന്നതിലും ആശയക്കുഴപ്പമുണ്ട്. പാലത്തിന്റെ അവസാനഘട്ട നിര്മാണത്തിന്റെ ദൃശ്യങ്ങളും ഇതിനിടെ പുറത്തുവന്നു.
പാലത്തിന്റെ മധ്യഭാഗത്തെ ആര്ച്ച് അടക്കം നിര്മാണം പൂര്ത്തിയാകാനുണ്ടെന്നതാണ് ദൃശ്യങ്ങളിൽ നിന്ന് വ്യക്തമാകുന്നത്. എന്നാൽ, ഉദ്ഘാടനവുമായി ബന്ധപ്പെട്ട് രണ്ടു തരത്തിലുള്ള പോസ്റ്ററുകളും പ്രചരിക്കുന്നുണ്ട്. ആദ്യം ഇറക്കിയ പോസ്റ്ററിൽ പാലം ഉദ്ഘാടനം എന്നായിരുന്നു. എന്നാൽ, രണ്ടാമത് ഇറക്കിയ പോസ്റ്ററിൽ പാലത്തിന്റെ അപ്രോച്ച് റോഡ് എന്നായി. അപ്രോച്ച് റോഡ് മാത്രമാണ് തീര്ന്നതെന്നും പാലത്തിന്റെ പണി തീര്ന്നില്ലെന്നുമാണ് കോഴഞ്ചേരി സിപിഎം ഏരിയ സെക്രട്ടറിയുടെ വിശദീകരണം. എന്നാൽ, പാലത്തിന്റെ പെയിന്റിങ് പണി മാത്രമേ ബാക്കിയുള്ളുവെന്നാണ് സിപിഎം ജില്ലാ സെക്രട്ടറി രാജു എബ്രഹാം പറയുന്നത്. അതേസമയം, എട്ടുവര്ഷമായി പാലം പണി നടന്നുകൊണ്ടിരിക്കുകയാണെന്നും ഇപ്പോള് തെരഞ്ഞെടുപ്പ് മുന്നിൽ കണ്ട് പൂര്ത്തിയാകാതെ ഉദ്ഘാടനത്തിന് ശ്രമിക്കുകയാണെന്നുമാണ് ആരോപണം.
