നിയമസഭാ തെരഞ്ഞെടുപ്പിലെ പരാജയത്തിന് കാരണം സിപിഎം അണികളുടെ ക്രോസ് വോട്ടിംഗും ന്യൂനപക്ഷ വോട്ടുകളുടെ ഏകീകരണവുമാണെന്ന് കേരള കോൺഗ്രസ് എം നേതാവ് ജോസ് കെ മാണി. സ്റ്റിയറിങ്ങ് കമ്മിറ്റി യോഗത്തിന് ശേഷം സംസാരിച്ച അദ്ദേഹം, പോരായ്മകൾ പരിശോധിച്ച് മുന്നോട്ട് പോകുമെന്നും വ്യക്തമാക്കി.
കോട്ടയം: നിയമസഭാ തെരഞ്ഞെടുപ്പിലേറ്റ വൻ പരാജയത്തിൽ പ്രതികരിച്ച് കേരള കോൺഗ്രസ് എം നേതാവ് ജോസ് കെ മാണി. സിപിഎം അണികൾ ക്രോസ് വോട്ട് ചെയ്തതും യുഡിഎഫിന് അനുകൂലമായി ന്യൂനപക്ഷ വോട്ടുകൾ ഏകീകരിച്ചതുമാണ് പരാജയത്തിന് കാരണമെന്ന് അദ്ദേഹം കുറ്റപ്പെടുത്തി. കേരള കോൺഗ്രസ് എം സ്റ്റിയറിങ്ങ് കമ്മിറ്റി യോഗത്തിന് ശേഷം നടത്തിയ വാർത്താ സമ്മേളനത്തിലായിരുന്നു പ്രതികരണം.
യുഡിഎഫിന് എല്ലാ വിജയ ആശംസകളും നേർന്ന പാർട്ടി ചെയ്ർമാൻ കേരള കോൺഗ്രസ് എം സ്ഥാനാർഥികൾ മികച്ച പോരാട്ടം നടത്തിയെന്നും അവകാശപ്പെട്ടു. സംസ്ഥാനത്ത് ഉണ്ടായ യുഡിഎഫ് തരംഗത്തിലാണ് എല്ലാവരും പരാജയപ്പെട്ടത്. പരാജയം ജനാധിപത്യത്തിൻ്റെ ഭാഗമാണ്. എന്താണ് പോരായ്മയെന്ന് പരിശോധിച്ച് പരിഹരിച്ച് സർക്കാർ മുന്നോട്ട് പോകും. സംഘടനാപരമായി പാർട്ടിയിൽ ചോർച്ച ഉണ്ടായിട്ടില്ലെന്നും മറിച്ച് പലയിടത്തും സിപിഎം അണികൾ ക്രോസ് വോട്ട് ചെയ്തെന്നും ജോസ് കെ മാണി പറഞ്ഞു.
സംസ്ഥാനത്ത് നിയമസഭാ തെരഞ്ഞെടുപ്പിൽ എൽഡിഎഫിൻ്റെ ഭാഗമായാണ് കേരള കോൺഗ്രസ് എം മത്സരിച്ചത്. പാർട്ടി ചെയർമാൻ ജോസ് കെ മാണി, മന്ത്രിയായിരുന്ന റോഷി അഗസ്റ്റിൻ അടക്കം പാർട്ടിയുടെ 12 സ്ഥാനാർത്ഥികളും തെരഞ്ഞെടുപ്പിൽ പരാജയപ്പെട്ടിരുന്നു. എന്നാൽ യുഡിഎഫ് സഖ്യകക്ഷിയായ കേരള കോൺഗ്രസ് മത്സരിച്ച എട്ടിൽ ഏഴ് സീറ്റിലും അവർ വിജയിച്ചു.
