ആരാണ് സിബിഐയെ തടയുന്നത്. അത് സി ബി ഐ വ്യക്തമാക്കണമെന്നും ജയരാജന് ആവശ്യപ്പെട്ടു
കണ്ണൂര്: തൊഴിയൂർ കേസില് നിരപരാധികളെ വെറുതെ വിട്ട പോലെ ഫസൽ കേസിലെ നിരപരാധികളെയും കുറ്റവിമുക്തരാക്കണമെന്ന് സി പി എം കണ്ണൂർ ജില്ല സെക്രട്ടറി എം വി ജയരാജൻ ആവശ്യപ്പെട്ടു. തൊഴിയൂർ കേസിലെ സമാന സഹാചര്യം ഫസൽ കേസിലും ഉണ്ടെന്നും അതിനാൽ സി ബി ഐ പുനരന്വേഷണത്തിന് തയ്യാറാവണമെന്നും അദ്ദേഹം ആവശ്യപ്പെട്ടു.
കാരായി രാജൻ, കാരായി ചന്ദ്രശേഖരൻ ഉൾപ്പെടെയുള്ള നിരപരാധികളായ സി പി എം പ്രവർത്തകരെ കുറ്റവിമുക്തരാക്കാന് സി ബി ഐ തയ്യാറാവണം. ഒരു കേസിലും ഇല്ലാത്ത നീതി നിഷേധം ഫസൽ കേസിൽ കാരായി രാജനും കാരായി ചന്ദ്രശേഖരനും നേരിടുന്നുണ്ടെന്നും ജയരാജൻ അഭിപ്രായപ്പെട്ടു.
വിഷയത്തില് സംസ്ഥാന സർക്കാറല്ല നടപടി എടുക്കേണ്ടതെന്നും സി ബി ഐ ആണ് തീരുമാനം കൈകൊള്ളേണ്ടതെന്നും അദ്ദേഹം ചൂണ്ടികാട്ടി. ഇക്കാര്യത്തില് ആരാണ് സിബിഐയെ തടയുന്നത്. അത് സി ബി ഐ വ്യക്തമാക്കണമെന്നും ജയരാജന് ആവശ്യപ്പെട്ടു.
