സ്വർണക്കടത്ത് കേസിൻ്റെ വിചാരണ മറ്റൊരു കോടതിയിലേക്ക് മാറ്റണമെന്ന് ഇഡി; നടക്കില്ലെന്ന് എന്ഐഎ
കേസിന്റെ വിചാരണ അനധികൃത പണം കൈമാറ്റവുമായി ബന്ധപ്പെട്ട പ്രത്യേക കോടതിയിലേക്ക് മാറ്റണമെന്നാണ് എൻഫോഴ്സ്മെൻ്റ് ഡയറക്ടറേറ്റിന്റെ ആവശ്യം. തങ്ങള് രജിസ്റ്റര് ചെയ്ത കേസുകൾ വിചാരണ ചെയ്യേണ്ടത് എൻഐഎ കോടതിയിലാണ് എന്നാണ് മറുവാദം.
കൊച്ചി: സ്വർണക്കള്ളക്കടത്ത് കേസിന്റെ അന്വേഷണവുമായി ബന്ധപ്പെട്ട് കേന്ദ്ര ഏജൻസികൾ തമ്മിൽ തർക്കം. എൻഐഎ കേസിൻ്റെ വിചാരണ മറ്റൊരു കോടതിയിലേക്ക് മാറ്റണമെന്ന് എൻഫോഴ്സ്മെൻ്റ് ആവശ്യപ്പെട്ടു. ഇക്കാര്യം ആവശ്യമുന്നയിച്ച് കൊച്ചിയിലെ എൻഐഎ കോടതിയിലാണ് ഇഡി അപേക്ഷ നൽകിയത്. നടക്കില്ലെന്നാണ് എൻഐഎയുടെ നിലപാട്.
കേസിന്റെ വിചാരണ അനധികൃത പണം കൈമാറ്റവുമായി ബന്ധപ്പെട്ട പ്രത്യേക കോടതിയിലേക്ക് മാറ്റണമെന്നാണ് എൻഫോഴ്സ്മെൻ്റ് ഡയറക്ടറേറ്റിന്റെ ആവശ്യം. കള്ളപ്പണം വെറുപ്പിക്കുന്നതിനെതിരായ പിഎംഎല്എ നിയമത്തിൻ്റെ പരിധിയിൽ വരുന്നതാണ് എൻഐഎ രജിസ്റ്റർ ചെയ്ത കേസെന്ന് ഇഡി വാദിക്കുന്നു. ഈ ആവശ്യത്തെ എൻഐഎ പൂര്ണ്ണായും എതിർത്തു. തങ്ങള് രജിസ്റ്റര് ചെയ്ത കേസുകൾ വിചാരണ ചെയ്യേണ്ടത് എൻഐഎ കോടതിയിലാണ് എന്നാണ് മറുവാദം. എന്തിനാണ് ഇങ്ങനെയൊരു ഹർജിയുമായി വന്നതെന്നും എൻഐഎ ഇഡിയോട് ചോദിച്ചു. ഹർജിയിൽ അടുത്തയാഴ്ച വീണ്ടും വാദം കേൾക്കും.