'വരുമാനത്തിലും ഞെട്ടിച്ച് കുടുംബശ്രീ'; അഭിനന്ദിച്ച് മന്ത്രി
കുടുംബശ്രീയുടെ ഉല്‍പന്ന പ്രദര്‍ശന വിപണന മേളയില്‍ 48.71 ലക്ഷം രൂപയും വരുമാനം ലഭിച്ചെന്നും മന്ത്രി രാജേഷ്.
തിരുവനന്തപുരം: കേരളീയം 2023 പരിപാടിയിലെ വില്‍പ്പനയില്‍ ചരിത്രമെഴുതിയ കുടുംബശ്രീ പ്രവര്‍ത്തകരെ അഭിനന്ദിച്ച് മന്ത്രി എംബി രാജേഷ്. രുചിയുടെയും വിഭവങ്ങളുടെയും വൈവിധ്യം കൊണ്ടു മാത്രമല്ല, വരുമാനത്തിലും കുടുംബശ്രീക്കാര്‍ ഞെട്ടിച്ചെന്ന് മന്ത്രി പറഞ്ഞു. വനസുന്ദരി അടക്കിവാണ ഫുഡ്‌കോര്‍ട്ടിലൂടെ വരുമാനം 87.98 ലക്ഷം രൂപയാണ്. ഇതില്‍ വനസുന്ദരി വിഭവത്തിന്റെ മാത്രം വില്‍പ്പന 15.63 ലക്ഷമാണ്. കുടുംബശ്രീയുടെ ഉല്‍പന്ന പ്രദര്‍ശന വിപണന മേളയില്‍ 48.71 ലക്ഷം രൂപയും വരുമാനം ലഭിച്ചെന്നും മന്ത്രി രാജേഷ് പറഞ്ഞു.
എംബി രാജേഷിന്റെ കുറിപ്പ്: രുചിയുടെയും വിഭവങ്ങളുടെയും വൈവിധ്യം കൊണ്ടു മാത്രമല്ല, വരുമാനത്തിലും ഏവരേയും ഞെട്ടിക്കുകയാണ് കുടുംബശ്രീ. കേരളീയത്തില്‍ ഏഴ് ദിവസം കൊണ്ട് കുടുബശ്രീ നേടിയ വരുമാനം 1,36,69,911 രൂപയാണ്. വനസുന്ദരി അടക്കിവാണ ഫുഡ്‌കോര്‍ട്ടിലൂടെ വരുമാനം 87.98 ലക്ഷം രൂപ, ഇതില്‍ വനസുന്ദരി വിഭവത്തിന്റെ മാത്രം വില്‍പ്പന 15.63 ലക്ഷമാണ്. കുടുംബശ്രീയുടെ ഉല്‍പന്ന പ്രദര്‍ശന വിപണന മേളയില്‍ 48.71 ലക്ഷം രൂപയും വരുമാനം ലഭിച്ചു. എല്ലാ കുടുംബശ്രീ പ്രവര്‍ത്തകരേയും ഹൃദയപൂര്‍വ്വം അഭിവാദ്യം ചെയ്യുന്നു.
'മലയാളി അടുക്കള' എന്നു പേരിട്ട ഫുഡ്‌കോര്‍ട്ടില്‍ കേരളീയം അവസാന ദിവസമായ നവംബര്‍ ഏഴിന് മാത്രം ലഭിച്ചത് 18.56 ലക്ഷം രൂപയാണ്. കുടുംബശ്രീ സൂക്ഷ്മസംരംഭ മേഖലയില്‍ പ്രവര്‍ത്തിക്കുന്ന പതിനാല് കാന്റീന്‍ കാറ്ററിങ്ങ് യൂണിറ്റുകളാണ് ഫുഡ് കോര്‍ട്ടില്‍ പങ്കെടുത്തത്. കേരളത്തിലെ എല്ലാ പ്രാദേശിക രുചിവൈവിധ്യങ്ങളും ആസ്വദിച്ചറിയുന്നതിനുള്ള അപൂര്‍വ അവസരം ഉപയോഗപ്പെടുത്താന്‍ പതിനായിരങ്ങളാണ് ഒഴുകിയെത്തിയത്. ഉല്‍പ്പന്ന പ്രദര്‍ശന വില്‍പ്പനശാലയില്‍ 14 ജില്ലകളില്‍ നിന്ന് തെരഞ്ഞെടുത്ത 49 കുടുംബശ്രീ സ്റ്റാളുകളാണ് ഒരുക്കിയിരുന്നത്. ലക്ഷക്കണക്കിന് പേര്‍ സന്ദര്‍ശിച്ച ഫുഡ്‌കോര്‍ട്ടിലും വിപണന സ്റ്റാളിലും പൂര്‍ണമായും ഹരിത ചട്ടം പാലിക്കാനും ഫലപ്രദമായ മാലിന്യ സംസ്‌ക്കരണം നടപ്പാക്കാന്‍ കഴിഞ്ഞതും എടുത്തുപറയേണ്ട മറ്റൊരു നേട്ടമാണ്.
എല്ലാ കുടുംബശ്രീ പ്രവര്‍ത്തകര്‍ക്കും ഒരിക്കല്‍ക്കൂടി അഭിനന്ദനങ്ങള്‍.
'എന്താണ് തെറ്റ്? ആര്‍ക്കാണ് ആശങ്ക? ആരാണ് ഭയപ്പെടുന്നത്?'; 'ആദിമം പരിപാടി' ചര്‍ച്ചകളില്‍ ഇപി ജയരാജന്‍
