പാലക്കാട് മലമക്കാവിൽ 'ജി-ലൈഫ്' എന്ന പേരിൽ അത്യാധുനിക റോബോട്ടിക് പുനരധിവാസ ആശുപത്രി സ്ഥാപിക്കുന്നു. പക്ഷാഘാതം, നട്ടെല്ലിന് ക്ഷതം തുടങ്ങിയ അവസ്ഥകളിലുള്ളവർക്ക് ജെൻറോബോട്ടിക്സിന്റെ സാങ്കേതികവിദ്യ ഉപയോഗിച്ച് ചലനശേഷി വീണ്ടെടുക്കാൻ ഇവിടെ സൗകര്യമൊരുക്കും
പാലക്കാട്: ആനക്കരയ്ക്കടുത്ത് മലമക്കാവിൽ അത്യാധുനിക റോബോട്ടിക് പുനരധിവാസ ആശുപത്രി സ്ഥാപിക്കുന്നു. തദ്ദേശ സ്വയംഭരണ വകുപ്പ് മന്ത്രി എം.ബി. രാജേഷ് നിർവഹിച്ചു. കെ.ടി. ജലീൽ എംഎൽഎ, മുൻ എം.എൽ.എ വി.ടി. ബലറാം, പഞ്ചായത്ത് പ്രസിഡന്റ് അംബിക ടീച്ചർ, ആഫ്രിക്ക ജെൻറോബോട്ടിക്സ് ഡയറക്ടർ ജസ്റ്റിസ് പിറ്റ്സോ തുടങ്ങിയവർ പങ്കെടുത്തു. ജെൻറോബോട്ടിക്സ് സഹസ്ഥാപകൻ വിമൽ ഗോവിന്ദും, കൊൽക്കത്ത ആസ്ഥാനമായി പ്രവർത്തിക്കുന്ന പ്രമുഖ വിദ്യാഭ്യാസ സംരംഭകനായ ടി.കെ. ഗോപാലനും ചേർന്നാണ് 'ജി-ലൈഫ്' എന്ന പുതിയ സംരംഭത്തിന് തുടക്കം കുറിച്ചത്. പക്ഷാഘാതം, നട്ടെല്ലിന് ക്ഷതമേറ്റവർ, അപകടങ്ങൾ മൂലം ചലനശേഷി നഷ്ടപ്പെട്ടവർ, സെറിബ്രൽ പാൾസി, പാർക്കിൻസൺസ് തുടങ്ങിയ അവസ്ഥകളിലുള്ളവർക്ക് ന്യൂറോ-റീഹാബിലിറ്റേഷനിലൂടെ ചലനശേഷി വീണ്ടെടുക്കാനുള്ള സൗകര്യമാണ് ഇവിടെ ഒരുക്കുന്നത്. മെഡിക്കൽ വൈദഗ്ധ്യവും അത്യാധുനിക റോബോട്ടിക് സാങ്കേതികവിദ്യയും കൃത്യമായ ചികിത്സാ പദ്ധതികളും ഒത്തുചേരുന്നതിലൂടെ രോഗികൾക്ക് മികച്ച പുരോഗതി ഉറപ്പാക്കാൻ ആശുപത്രിക്ക് സാധിക്കും.
ജി-ലൈഫ് ഹെൽത്ത്കെയർ പോലുള്ള പദ്ധതികൾ കേരളത്തിന്റെ മെഡിക്കൽ ഇന്നൊവേഷൻ സാധ്യതകളെയാണ് കാണിക്കുന്നതെന്ന് മന്ത്രി എം ബി രാജേഷ് പറഞ്ഞു. സാങ്കേതികവിദ്യയും ആധുനിക സാങ്കേതികവിദ്യയും സംയോജിപ്പിക്കുന്നതിലൂടെ ശാരീരിക വെല്ലുവിളികൾ നേരിടുന്ന പൗരന്മാരുടെ ജീവിതനിലവാരം മെച്ചപ്പെടുത്താൻ ആശുപത്രിക്ക് സാധിക്കുമെന്നും അദ്ദേഹം പറഞ്ഞു. ജെൻറോബോട്ടിക്സ് വികസിപ്പിച്ചെടുത്ത, റോബോട്ടിക് ഗെയ്റ്റ് ട്രെയിനിംഗിനായുള്ള 'ജി ഗെയ്റ്റർ' എന്ന അത്യാധുനിക സംവിധാനമായിരിക്കും ഈ ആശുപത്രിയുടെ പ്രധാന സവിശേഷത. കൂടാതെ, ജെൻറോബോട്ടിക്സിന്റെ ഏറ്റവും പുതിയ സാങ്കേതിക വിദ്യകളായ അപ്പർ ബോഡി പുനരധിവാസ റോബോട്ടുകളും ലോകത്താദ്യമായി ജി-ലൈഫിലൂടെ അവതരിപ്പിക്കും. ചികിത്സയ്ക്കിടയിലും ജോലിയിൽ തുടരാൻ ആഗ്രഹിക്കുന്നവർക്കായി പ്രത്യേക 'വർക്ക് ഫ്രം ഹോം' ഇടങ്ങളും, കൂട്ടിരിപ്പുകാർക്കായി താമസസൗകര്യങ്ങളും ക്യാമ്പസിനുള്ളിൽ തന്നെ ലഭ്യമാക്കും. കിംസിലെ വിദഗ്ദ്ധരായ ഡോക്ടർമാരുടെ നേരിട്ടുള്ള മേൽനോട്ടത്തിലായിരിക്കും ആശുപത്രി പ്രവർത്തിക്കുക.
