സന്നദ്ധ സേനയിൽ അംഗമാകണമെന്ന് കോൺഗ്രസ് പ്രവർത്തകരോട് കെപിസിസി പ്രസിഡന്റ്
കേരളത്തില് ഉണ്ടായ രണ്ടു പ്രളയങ്ങളിലും ഓഖി ചുഴലിക്കാറ്റ് സമയത്തും കോണ്ഗ്രസ് പ്രവര്ത്തകര് നടത്തിയ ദുരിതാശ്വാസ പ്രവര്ത്തനങ്ങള് കേരളീയ സമൂഹത്തിന് മറക്കാനാവില്ല
തിരുവനന്തപുരം: സംസ്ഥാന സർക്കാരിന്റെ സന്നദ്ധ സേനയിൽ കോൺഗ്രസ് പ്രവർത്തകരും അംഗമാകണമെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ. കൊവിഡ് രോഗപ്രതിരോധത്തിലും മറ്റു സേവനപ്രവര്നങ്ങളിലും പരമാവധി യുവ കോണ്ഗ്രസ് പ്രവര്ത്തകരും മഹിളാകോണ്ഗ്രസ് പ്രവർത്തകരും പൂര്ണ്ണമായി സഹകരിക്കണമെന്ന് അദ്ദേഹം ആവശ്യപ്പെട്ടു.
"കൊവിഡെന്ന മഹാമാരിയെ നാം എല്ലാം മറന്നുകൊണ്ട് ഒറ്റക്കെട്ടായി നേരിട്ടുകൊണ്ടിരിക്കുകയാണ്. ഈ ദുരന്തകാലത്ത് കഷ്ടത അനുഭവിക്കുന്ന പതിനായരങ്ങള്ക്ക് സഹായമെത്തിക്കേണ്ട സാമൂഹികമായ ഉത്തരവാദിത്തം ഓരോ കോണ്ഗ്രസുകാരനുമുണ്ട്. 'സന്നദ്ധ' എന്ന വെബ്പോര്ട്ടലില് ഓണ്ലൈന് വഴി രജിസ്റ്റര് ചെയ്ത് യുവ കോണ്ഗ്രസ് പ്രവര്ത്തകർ സന്നദ്ധ സേനയുടെ ഭാഗമാകണം."
കേരളത്തില് ഉണ്ടായ രണ്ടു പ്രളയങ്ങളിലും ഓഖി ചുഴലിക്കാറ്റ് സമയത്തും കോണ്ഗ്രസ് പ്രവര്ത്തകര് നടത്തിയ ദുരിതാശ്വാസ പ്രവര്ത്തനങ്ങള് കേരളീയ സമൂഹത്തിന് മറക്കാനാവില്ല. അതിനാല് ഈ മാഹാമാരിയെ ശക്തമായി പ്രതിരോധിക്കാനും ദുരിതമനുഭവിക്കുന്നവര്ക്ക് ആവശ്യമായ സഹായ സഹകരണം നല്കാനുമുള്ള പ്രവര്ത്തനങ്ങളില് സജീവമായി പങ്കാളിയാകനുമുള്ള ബാധ്യത ഓരോ കോണ്ഗ്രസ് പ്രവര്ത്തകനുമുണ്ടെന്നും അദ്ദേഹം ഓർമ്മിപ്പിച്ചു.