പരിസരത്ത് പടയപ്പയും മറ്റൊരു കാട്ടാനക്കൂട്ടവും; 'മണിയെ തുമ്പിക്കൈയിൽ ചുഴറ്റിയെറിഞ്ഞു', മൂന്നാറിൽ പ്രതിഷേധം
മൂന്നാര് കന്നിമല ടോപ്പ് ഡിവിഷന് സ്വദേശി മണി എന്നു വിളിക്കുന്ന സുരേഷ് കുമാര് (45) ആണ് കാട്ടാന ആക്രമണത്തില് മരിച്ചത്.
![munnar wild elephant attack one died two injured updates joy munnar wild elephant attack one died two injured updates joy](https://static-ai.asianetnews.com/images/01hqkjq8vy4dftjsz7rk7z9pc0/munnar-elephant-attack-death_363x203xt.jpg)
മൂന്നാര്: കന്നിമലയില് കാട്ടാന ആക്രമണത്തില് കൊല്ലപ്പെട്ട ഓട്ടോ ഡ്രൈവര് മണി എന്ന സുരേഷ് കുമാറിന്റെ പോസ്റ്റുമോര്ട്ടം ഇന്ന് നടക്കും. കാട്ടാന ആക്രമണത്തില് പരുക്കേറ്റ രണ്ടു പേര് മൂന്നാര് ടാറ്റാ ടീ ജനറല് ആശുപത്രിയില് ചികിത്സയിലാണ്.
മൂന്നാര് കന്നിമല ടോപ്പ് ഡിവിഷന് സ്വദേശി മണി എന്നു വിളിക്കുന്ന സുരേഷ് കുമാര് (45) ആണ് കാട്ടാന ആക്രമണത്തില് മരിച്ചത്. സുരേഷ് കുമാറിന്റെ ഓട്ടോയിലുണ്ടായിരുന്നു യാത്രക്കാരില് കന്നിമല സ്വദേശികളായ എസക്കി രാജ (45), ഭാര്യ റെജിന (39) എന്നിവര്ക്കാണ് പരുക്കേറ്റത്. ഇന്നലെ രാത്രി 9.30 മണിയോടെയായിരുന്നു സംഭവം. എസക്കി രാജയുടെ മകള് പ്രിയയുടെ സ്കൂള് ആനിവേഴ്സറി കഴിഞ്ഞ തിരികെ വരുമ്പോഴായിരുന്നു സംഭവം.
ഇവരോടൊപ്പം രണ്ട് ഇതര സംസ്ഥാന തൊഴിലാളികളുമുണ്ടായിരുന്നു. മണി ആണ് ഓട്ടോ ഓടിച്ചിരുന്നത്. കന്നിമല എസ്റ്റേറ്റ് ബംഗ്ലാവിന് സമീപത്ത് വച്ചാണ് ഇവര് കാട്ടാനയുടെ മുന്നിലകപ്പെട്ടത്. ഓട്ടോ കുത്തി മറിച്ചിട്ട കാട്ടാന വാഹനത്തില് നിന്നും തെറിച്ചു വീണ മണിയെ തുമ്പിക്കൈയില് ചുഴറ്റിയെടുത്ത് എറിയുകയായിരുന്നുവെന്ന് ദൃക്സാക്ഷികള് പറഞ്ഞു. തെറിച്ചു വീണ മണിയുടെ തലയ്ക്ക് ഗുരുതര പരുക്കേറ്റു. ഓട്ടോയിലുണ്ടായിരുന്ന പ്രിയക്കും രണ്ട് ഇതര സംസ്ഥാന തൊഴിലാളികള്ക്കും കാര്യമായ പരുക്കില്ല.
കാട്ടാനയായ പടയപ്പയും മറ്റൊരു കാട്ടാനക്കൂട്ടവും ഈ ഭാഗത്ത് രാവിലെ മുതല് ചുറ്റിത്തിരിയുന്നുണ്ടായിരുന്നു. ഏത് കാട്ടാനയാണ് ആക്രമണം നടത്തിയതെന്ന് വനംവകുപ്പ് പരിശോധിക്കുകയാണ്. മണിയുടെ മൃതദേഹം ഇന്ക്വസ്റ്റ് നടപടികള്ക്ക് ശേഷം അടിമാലി താലൂക്ക് ആശുപത്രിയില് പോസ്റ്റുമോര്ട്ടം നടത്തും. കഴിഞ്ഞ മാസം 23ന് മൂന്നാര് ഗുണ്ടുമലയിലും ഒരാള് കാട്ടാന ആക്രമണത്തില് കൊലപ്പെട്ടിരുന്നു. ഇതിനാല് മൂന്നാറില് തൊഴിലാളികളുടെ പ്രതിഷേധത്തിനു സാധ്യതയുണ്ട്.