തൃശൂർ നാട്ടിക ടോൾ പ്ലാസയിലെ ടോൾ പിരിവുമായി ബന്ധപ്പെട്ട് നടത്തിയ സർവകക്ഷിയോഗം അലസി പിരിഞ്ഞു
തൃശൂർ: തൃശൂർ നാട്ടിക ടോൾ പ്ലാസയിലെ ടോൾ പിരിവുമായി ബന്ധപ്പെട്ട് നടത്തിയ സർവകക്ഷിയോഗം അലസി പിരിഞ്ഞു. കലക്ടർ വിളിച്ച സർവകക്ഷി യോഗമാണ് പ്രതിഷേധത്തില്‍ അവസാനിച്ചത്. യോഗം നടക്കുന്നതിനിടെ ടോൾ പിരിവ് തുടങ്ങിയിരുന്നു. എൽഡിഎഫ്, യുഡിഎഫ് പ്രതിനിധികൾ യോഗത്തിൽ നിന്ന് ഇറങ്ങിപ്പോയി. പിന്നാലെ കലക്ട്രേറ്റിന്‍റെ പ്രധാന വാതിലിൽ കുത്തിയിരുന്ന് പ്രവർത്തകർ പ്രതിഷേധിച്ചു.
വിഷയത്തിലെ കളക്ടറുടെ നിലപാട് സംശയാസ്പദമെന്ന് സിപിഐഎം ജില്ലാ സെക്രട്ടറി കെ വി അബ്ദുൽ ഖാദർ പറഞ്ഞു. രാഷ്ട്രീയ പാർട്ടികളോടുള്ള അവഹേളനമെന്ന് കോണ്‍ഗ്രസ് നേതാവ് ടി എൻ പ്രതാപൻ പ്രതികരിച്ചു. ടോൾ പിരിക്കാൻ അനുവദിക്കില്ലെന്ന നിലപാടിലാണ് യോഗത്തില്‍ പങ്കെടുത്തവർക്ക്. വിഷയത്തില്‍ ഇന്ന് വൈകുന്നേരം നാട്ടികയിൽ പ്രതിഷേധം ഉണ്ടാകും.
ടോളിനെതിരെ ബി.ജെ.പിയും രംഗത്തെത്തിയിട്ടുണ്ട്. പണി പൂർത്തിയാകാതെ ടോൾ പിരിക്കരുത് എന്നാണ് നിലപാട്. സർവീസ് റോഡുകൾ പലയിടത്തും ഇല്ലെന്നും നടപ്പാലങ്ങൾ സ്ഥാപിച്ചിട്ടില്ല. വിഷയത്തില്‍ കേന്ദ്ര സർക്കാർ ഇടപെടണമെന്ന് ബിജെപി ജില്ലാ ജനറൽ സെക്രട്ടറി സുജയ് സേനൻ പ്രതികരിച്ചു.
Related Articles
