എറണാകുളം കടവുംഭാഗം സിനഗോഗിന് മുന്നിൽ തീയിട്ട കേസിൽ പ്രതി എബിൻ പോളിനെതിരെ യുഎപിഎ ചുമത്താൻ തീരുമാനിച്ചു. ഇയാൾക്ക് നിർദേശം നൽകിയ 'ബോസ്' എന്ന അജ്ഞാതനെ കണ്ടെത്താൻ അന്വേഷണം ഊർജ്ജിതമാക്കിയിരിക്കുകയാണ്. കേസ് ഉടൻ തന്നെ എൻഐഎ ഏറ്റെടുത്തേക്കും.
കൊച്ചി: എറണാകുളം കടവുംഭാഗം സിനഗോഗിന് മുന്നിൽ തീയിട്ട കേസില്‍ പ്രതി എബിൻ പോളിനെതിരെ യുഎപിഎ ചുമത്തും. യുഎപിഎ 16, 18 വകുപ്പുകളാണ് ചുമത്താൻ തീരുമാനിച്ചിരിക്കുന്നത്. ഇന്ത്യയുടെ ഐക്യം തകർക്കാൻ ലക്ഷ്യമാക്കിയുള്ള ആക്രമണം, ഭീകര പ്രവർത്തനത്തിനുള്ള ഗൂഢാലോചന തുടങ്ങിയ കുറ്റങ്ങളാണ് എബിൻ പോളിനെതിരെ ചുമത്തുക. കേസ് വൈകാതെ എൻഐഎ ഏറ്റെടുക്കും.
കഴിഞ്ഞ ദിവസം പ്രതിയുടെ പശ്ചാത്തലം, സൗഹൃദ വലയം തുടങ്ങിയവയെ കുറിച്ച് ആഴത്തിൽ മനസിലാക്കാനായി അന്വേഷണ സംഘം ഇയാൾ പഠിച്ച പുണെയിലെ സ്ഥാപനത്തിൽ പോയിരുന്നു. മൂവാറ്റുപുഴയിലെ യൂസ്ഡ് കാർ ഷോറൂമിനും, ഒഴിഞ്ഞു കിടന്ന വീടിനും തീവച്ചത് എബിനാണെന്ന് കണ്ടെത്തിയതോടെയാണ് കേസിൻ്റെ ഗൗരവം മാറിയത്. ബോസ് എന്നയാളുടെ നിർദേശപ്രകാരം എബിൻ കൃത്യങ്ങൾ ചെയ്തെന്നാണ് പൊലീസിൻ്റെ കണ്ടെത്തൽ. എന്നാൽ ബോസ് ആരാണെന്ന് വ്യക്തമായിട്ടില്ല. തനിക്ക് നിർദേശം നൽകിയത് വിക്രം എന്നയാളാണെന്ന് എബിൻ മൊഴി നൽകിയിരുന്നു. ഇത് വിദേശത്ത് നിന്നുള്ള ആരെങ്കിലുമാണോയെന്ന് പൊലീസ് സംശയിക്കുന്നുണ്ട്. വിക്രം തന്നെയാണോ ബോസ് എന്നും പൊലീസിന് സംശയമുണ്ട്. ജുഡീഷ്യൽ കസ്റ്റഡിയിലുള്ള എബിൻ പോളിനെ ആവശ്യമെങ്കിൽ കൂടുതൽ ചോദ്യം ചെയ്യലിനായി പിന്നീട് കസ്റ്റഡിയിൽ വാങ്ങും. ഇയാളുടെ ഫോൺ ആണ് പൊലീസിൻ്റെ പ്രധാന കച്ചിത്തുരുമ്പ്. ഇത് വിശദമായി പരിശോധിച്ച് കൂടുതൽ വിവരങ്ങൾ കണ്ടെത്താനാകുമെന്നാണ് പ്രതീക്ഷ.
