ഓൺലൈനിൽ ഓർഡർ ചെയ്ത ആൻഡ്രോയിഡ് ഉപകരണത്തിന് പകരം പാർസലിൽ നിന്ന് ചാണകം ലഭിച്ചതായി പരാതി
ഗ്രേറ്റർ നോയിഡ: ഓൺലൈനിൽ ഓർഡർ ചെയ്ത ആൻഡ്രോയിഡ് ഉപകരണത്തിന് പകരം പാർസലിൽ നിന്ന് ചാണകം ലഭിച്ചതായി പരാതി. ഗ്രേറ്റർ നോയിഡയിലെ ദൻകൗർ പോലീസ് സ്റ്റേഷൻ പരിധിയിലെ നിവാസിയായ ആകാശ് എന്നയാൾക്കാണ് ഓൺലൈൻ ഷോപ്പിംഗിൽ ഇത്തരമൊരനുഭവം ഉണ്ടായത്. ജോലി ആവശ്യത്തിനായി ഏതാനും ദിവസങ്ങൾക്ക് മുൻപാണ് ഒരു വെബ്സൈറ്റ് വഴി 1,999 രൂപ വിലമതിക്കുന്ന ആൻഡ്രോയിഡ് ഉപകരണം ആകാശ് ഓർഡർ ചെയ്തത്. ബുക്കിംഗ് സമയത്തുതന്നെ അദ്ദേഹം തുക മുഴുവനായും ഓൺലൈൻ വഴി അടയ്ക്കുകയും ചെയ്തിരുന്നു. തിങ്കളാഴ്ച വൈകുന്നേരം 5 മണിയോടെ കൊറിയർ വഴി വീട്ടിൽ ലഭിച്ച പാർസൽ തുറന്നു നോക്കിയപ്പോഴാണ് ഉപകരണത്തിന് പകരം ഉണങ്ങിയ ചാണകം അടങ്ങിയ പാക്കറ്റ് കണ്ട് ആകാശ് ഞെട്ടിയത്.
തുടർന്ന് താൻ വഞ്ചിക്കപ്പെട്ടതായി തിരിച്ചറിഞ്ഞ ആകാശ് സംഭവത്തിൽ കർശന നടപടി ആവശ്യപ്പെട്ട് സൈബർ ക്രൈം പോലീസിൽ ഔദ്യോഗികമായി പരാതി നൽകി. സംഭവത്തിൽ അന്വേഷണം ആരംഭിച്ചതായി പോലീസ് ഉദ്യോഗസ്ഥർ സ്ഥിരീകരിച്ചു. സാധനം ബുക്ക് ചെയ്ത വെബ്സൈറ്റ്, പണമിടപാട് വിവരങ്ങൾ, കൊറിയർ ഡെലിവറി ശൃംഖല എന്നിവ കേന്ദ്രീകരിച്ചാണ് നിലവിൽ അന്വേഷണം പുരോഗമിക്കുന്നത്. പരിശോധനകൾക്ക് ശേഷം കുറ്റക്കാർക്കെതിരെ ശക്തമായ നിയമനടപടികൾ സ്വീകരിക്കുമെന്ന് അധികൃതർ അറിയിച്ചു. വ്യാജവും സ്ഥിരീകരിക്കാത്തതുമായ വെബ്സൈറ്റുകൾ വഴി ഓൺലൈൻ സാധനങ്ങൾ വാങ്ങുമ്പോൾ ജാഗ്രത പാലിക്കണമെന്ന് സൈബർ സുരക്ഷാ വിദഗ്ധരും മുന്നറിയിപ്പ് നൽകുന്നു.
