ആരുമില്ലെന്ന് ഉറപ്പ് വരുത്തി ഒഴിഞ്ഞ സ്ഥലത്തേക്ക് നീങ്ങി, പണം എണ്ണുന്നത് കണ്ടതോടെ നാട്ടുകാർ പിടികൂടി; പൊളിഞ്ഞത് ഹംസയുടെ ഭിക്ഷാടന തന്ത്രം

അന്ധനായി അഭിനയിച്ച് ഭിക്ഷാടനം നടത്തിയിരുന്ന ആളുടെ കള്ളത്തരം പൊളിച്ച് നാട്ടുകാർ. മലപ്പുറം വളാഞ്ചേരിയിലാണ് സംഭവം

Image Credit: Asianet News

മലപ്പുറം: അന്ധനായി അഭിനയിച്ച് ഭിക്ഷാടനം നടത്തിയിരുന്ന ആളുടെ കള്ളത്തരം പൊളിച്ച് നാട്ടുകാർ. മലപ്പുറം വളാഞ്ചേരിയിലാണ് സംഭവം. ആളൊഴിഞ്ഞ സ്ഥലത്തിരുന്ന് പണം എണ്ണി നോക്കിയതാണ് കോട്ടയം സ്വദേശി ഹംസയെ കുടുക്കിയത്. ഹംസ വളാഞ്ചേരിയിൽ എത്തിയത് രണ്ട് മാസം മുമ്പാണ്. കറുത്ത കണ്ണടയും വച്ച് അന്ധനാണെന്നും പറഞ്ഞായിരുന്നു ഇയാൾ ഭിക്ഷാടനം നടത്തിയത്. ആളുകളൊക്കെ ഇയാൾക്ക് പണം കൊടുത്ത് സഹായിച്ചു. കണ്ണ് കാണാത്തവർക്കായുള്ള പുനരധിവാസ കേന്ദ്രത്തിലേക്ക് മാറ്റാമെന്ന് നാട്ടുകാർ പറഞ്ഞു എന്നാല്‍ ഹംസ ഇത് നിരസിക്കുകയായിരുന്നു.

ഇതോടെയാണ് വളാഞ്ചേരിക്കാർക്ക് സംശയം തോന്നിയത്. ഇന്ന് പുലർച്ചെ ആളൊഴിഞ്ഞ സ്ഥലത്തേക്ക് ഹംസ പോകുന്നത് നാട്ടുകാരിൽ ചിലർ കണ്ടു. പിന്നെ കാണുന്നത് കറുത്ത കണ്ണട ഊരി മാറ്റിയ ശേഷം കൈവശമുണ്ടായിരുന്ന പണം എണ്ണുന്ന ഹംസയെയാണ്. കള്ളത്തരം കയ്യോടെ പിടിച്ചപ്പോൾ ഹംസയ്ക്കും കള്ളി സമ്മതിക്കേണ്ടി വന്നു.