സംസ്ഥാനത്തെ സര്‍ക്കാര്‍ ജീവനക്കാരുടെ ശമ്പള വിതരണം ഭാഗികമായി തടസപ്പെട്ടു
മുംബൈയിലുണ്ടായ വെള്ളപ്പൊക്കത്തെ തുടര്‍ന്ന ആര്‍ബിഐയുടെ സെര്‍വറുകളിലുണ്ടായ തകരാറാണ് കേരളത്തിലെ ഉദ്യോഗസ്ഥരുടെ ശമ്പളവിതരണത്തിന് തടസമായത്.
തിരുവനന്തപുരം: സംസ്ഥാനത്തെ ഒരു വിഭാഗം സർക്കാർ ജീവനക്കാരുടെ ശമ്പളം മുടങ്ങി. ബാങ്ക് വഴി ശമ്പളം വാങ്ങുന്ന ജീവനക്കാരിൽ ഒരു വിഭാഗത്തിനാണ് ശമ്പളം മുടങ്ങിയത്. ട്രഷറിയിൽ നിന്നും റിസർവ് ബാങ്കിലേക്ക് പണം മാറുന്ന ഇ-കുബേർ സോഫ്റ്റുവയറിലുണ്ടായ തകരാണ് ശമ്പളം മുടങ്ങാനിടയാക്കിയതെന്ന് ധനകാര്യവകുപ്പ് ഉദ്യോഗസ്ഥര്‍ അറിയിച്ചു.
മുംബൈയിലുണ്ടായ ശക്തമായ മഴയെ തുടര്‍ന്ന് സോഫ്റ്റ്വയർ തകരാറിലായതാണ് ശമ്പളവിതരണം തടസപ്പെടാന്‍ കാരണമെന്നാണ് ആര്‍ബിഐ സംസ്ഥാന സര്‍ക്കാരിനെ അറിയിച്ചിട്ടുള്ളത്. നാളെ ഉച്ചയോടെ തകരാർ പരിഹരിച്ച് ശമ്പളം വിതരണം പൂര്‍ത്തിയാക്കുമെന്നും ആർബിഐ അറിയിച്ചിട്ടുണ്ട്. അതേസമയം ട്രഷറി വഴി ശമ്പളം വാങ്ങുന്ന സർക്കാർ ഉദ്യോഗസ്ഥര്‍ക്ക് സാധാരണ പോലെ തന്നെ ശമ്പളം കിട്ടി.
