ലോക്ക്ഡൗൺ ലംഘിച്ച് മൂന്നാം ക്ലാസ്സുകാരന് ട്യൂഷൻ, ക്രൂരമർദ്ദനത്തിന് ഇരയായി കുട്ടി
അടി കിട്ടിയ വിവരം കുട്ടി വീട്ടിൽ തിരിച്ചെത്തിയ ശേഷം പറഞ്ഞുവെങ്കിലും വീട്ടുകാർ വിഷയം ചൈൽഡ് ലൈനിനെയോ പൊലീസിനെയോ അറിയിച്ചില്ല. അയൽവാസിയായ ആശ പ്രവർത്തകയാണ് വിവരം പുറത്തറിയിക്കുന്നത്.
ആലപ്പുഴ: ചെങ്ങന്നൂർ മുളക്കുഴിയിൽ മൂന്നാം ക്ലാസ് വിദ്യാ‌ർത്ഥിക്ക് ട്യൂഷൻ അധ്യാപകൻ്റെ മർദ്ദനം. അധ്യാപകനായ മുളക്കുഴ സ്വദേശി മുരളിക്കെതിരെ ചെങ്ങന്നൂർ പൊലീസ് കേസെടുത്തു. ജുവനൈൽ നിയമപ്രകാരമാണ് കേസെടുത്തത്. ലോക്ക് ഡൗൺ കാലത്ത് ട്യൂഷൻ ക്ലാസ് നടത്തിയതിനും ഇയാൾക്കെതിരെ കേസെടുത്തിട്ടുണ്ട്. കുട്ടിയെ അധ്യാപകൻ മ‍ർദ്ദിച്ചതറിഞ്ഞ വാ‌ർഡ് മെമ്പ‌റാണ് ചൈൽഡ് ലൈനിലും പൊലീസിലും പരാതി നൽകിയത്.
ശനിയാഴ്ച വൈകിട്ടാണ് കുട്ടിക്ക് അധ്യാപകൻ്റെ മർദ്ദനമേറ്റത്. കുട്ടിയുടെ ദേഹമാസകലം ചൂരൽ കൊണ്ട് അടിച്ച പാടുകളുണ്ട്. മുരളി കുട്ടികളെ അടിക്കുന്നതും മോശമായി സംസാരിക്കുന്നതും പതിവാണെന്ന് നാട്ടുകാർ പറയുന്നു. അടി കിട്ടിയ വിവരം കുട്ടി വീട്ടുകാരെ അറിയിച്ചിരുന്നെങ്കിലും അവർ ഇക്കാര്യം ചൈൽഡ് ലൈനിനെയോ പൊലീസിനെയോ അറിയിച്ചില്ല. അയൽവാസിയായ ആശ പ്രവർത്തകയാണ് വിവരം പുറത്തറിയിക്കുന്നത്.
അധ്യാപകനെ അറസ്റ്റ് ചെയ്തേക്കും.
