പി ടി തോമസിന്റെ ഭാര്യ ഉമ തോമസാണ് തൃക്കാക്കരയിലെ യുഡിഎഫ് സ്ഥാനാർത്ഥി. ആർ എസ് അരുൺകുമാർ ഇടതുസ്ഥാനാർത്ഥി ആകുമെന്നാണ് പ്രതീക്ഷിക്കപ്പെടുന്നത്.
കോഴിക്കോട്: തൃക്കാക്കര ഉപതെരഞ്ഞെടുപ്പ് സർക്കാരിന്റെ വിലയിരുത്തലാകും എന്ന് മുസ്ലിം ലീഗ് നേതാവ് പി കെ കുഞ്ഞാലിക്കുട്ടി. സിൽവർലൈൻ ഉൾപ്പെടെ പിണറായി സർക്കാരിന്റെ തെറ്റായ തീരുമാനങ്ങൾ എല്ലാം ചർച്ചയാകും. യുഡിഎഫിന്റെ സമയമാണ് വരാൻ പോകുന്നതെന്നും കുഞ്ഞാലിക്കുട്ടി കോഴിക്കോട് പറഞ്ഞു. പി ടി തോമസിന്റെ ഭാര്യ ഉമ തോമസാണ് തൃക്കാക്കരയിലെ യുഡിഎഫ് സ്ഥാനാർത്ഥി. ആർ എസ് അരുൺകുമാർ ഇടതുസ്ഥാനാർത്ഥി ആകുമെന്നാണ് പ്രതീക്ഷിക്കപ്പെടുന്നത്.
പിടിയുടെ കല്ലറയിലെത്തി പ്രാർത്ഥിച്ച് ഉമ
രാവിലെ പി ടി തോമസിന്റെ ജന്മനാടായ ഇടുക്കിയിലെ ഉപ്പുതോട്ടിൽ ഉമ തോമസ് എത്തിയിരുന്നു. പള്ളിയിലെ പ്രാർത്ഥനയ്ക്ക് ശേഷം പി ടി തോമസിന്റെ കല്ലറയിലെത്തി പ്രാർത്ഥിച്ചു. ഉപ്പുതോടിലെ ആളുകളെ നേരിൽ കണ്ട് കുശലാന്വേഷണവും നടത്തി. തുടർന്ന് ഇടുക്കി ബിഷപ്പിനെയും സന്ദർശിച്ചു.
കെ വി തോമസിന്റെ അനുഗ്രഹം വാങ്ങും
കെ വി തോമസ് (kv thomas) ഒരിക്കലും തനിക്കെതിരെ പ്രവർത്തിക്കില്ലെന്ന് തൃക്കാക്കരയിലെ കോൺഗ്രസ് സ്ഥാനാർഥി ഉമ തോമസ് (uma thomas). കോൺഗ്രസിന്റെ മുതിർന്ന നേതാവായ അദ്ദേഹം പാർട്ടി പാളയത്തിൽ തന്നെ ഉണ്ടാകും. പി ടി തോമസിനെ എന്നും ചേർത്തുപിടിച്ച ആളാണ് കെ വി തോമസ്. അദ്ദേഹത്തെ നേരിൽ കണ്ട് അനുഗ്രഹം തേടുമെന്നും ഉമ തോമസ് പറഞ്ഞു.
