എറണാകുളം ജംഗ്ഷൻ റെയിൽവേ സ്റ്റേഷനിലെ പ്ലാറ്റ്ഫോം നവീകരണത്തെ തുടർന്ന് മാർച്ച് 18 മുതൽ 26 വരെ ട്രെയിൻ സർവീസുകൾക്ക് നിയന്ത്രണം ഏർപ്പെടുത്തി. മെമു, പാസഞ്ചർ, എക്സ്പ്രസ് ഉൾപ്പെടെ പല ട്രെയിനുകളും ഭാഗികമായി റദ്ദാക്കുകയോ യാത്ര മറ്റ് സ്റ്റേഷനുകളിൽ അവസാനിപ്പിക്കുകയോ ചെയ്യും. യാത്രക്കാർ പുതിയ സമയക്രമം പരിശോധിച്ച് യാത്ര ചെയ്യണമെന്ന് റെയിൽവേ അറിയിച്ചു.
കൊച്ചി: എറണാകുളം ജംഗ്ഷൻ (സൗത്ത്) റെയിൽവേ സ്റ്റേഷനിലെ പ്ലാറ്റ്ഫോം നവീകരണ പ്രവർത്തനങ്ങൾ ആരംഭിക്കുന്നതിനെത്തുടർന്ന് നാളെ മുതൽ ട്രെയിൻ സർവീസുകൾക്ക് റെയിൽവേ നിയന്ത്രണം ഏർപ്പെടുത്തി. മാർച്ച് 18 മുതൽ 26 വരെയാണ് പ്രധാന നിയന്ത്രണങ്ങൾ. കൊച്ചിയിലേക്കും തിരിച്ചുമുള്ള മെമു, പാസഞ്ചർ, എക്സ്പ്രസ് ട്രെയിനുകൾ പലതും ഭാഗികമായി റദ്ദാക്കിയിട്ടുണ്ട്. യാത്രക്കാർ മുൻകൂട്ടി വിവരങ്ങൾ മനസ്സിലാക്കി യാത്ര ക്രമീകരിക്കണമെന്ന് റെയിൽവേ അധികൃതർ അറിയിച്ചു.
നവീകരണ കാലയളവിൽ പാലക്കാട്-എറണാകുളം മെമു ആലുവയിൽ സർവീസ് അവസാനിപ്പിക്കും. എറണാകുളം-പാലക്കാട് മെമു 26 വരെ ആലുവയിൽ നിന്നായിരിക്കും സർവീസ് ആരംഭിക്കുക. ഗുരുവായൂർ-എറണാകുളം പാസഞ്ചർ ഇടപ്പള്ളിയിലും, കൊല്ലം-എറണാകുളം മെമു തൃപ്പൂണിത്തുറയിലും യാത്ര
അവസാനിപ്പിക്കും.
Related Articles
തിരുവനന്തപുരം-എറണാകുളം വഞ്ചിനാട് എക്സ്പ്രസ് ഈ ദിവസങ്ങളിൽ കോട്ടയം വരെ മാത്രമേ സർവീസ് നടത്തുകയുള്ളൂ. കോട്ടയത്തിനും എറണാകുളത്തിനും ഇടയിൽ വഞ്ചിനാട് എക്സ്പ്രസ് സർവീസ് ഉണ്ടായിരിക്കില്ല.
വടക്കൻ കേരളത്തിലേക്കുള്ള യാത്രക്കാരെയും നിയന്ത്രണം ബാധിക്കും. എറണാകുളം-കണ്ണൂർ ഇന്റർസിറ്റി എക്സ്പ്രസ് എറണാകുളത്തിന് പകരം ആലുവയിൽ നിന്നായിരിക്കും യാത്ര ആരംഭിക്കുക. എറണാകുളത്തിനും ആലുവയ്ക്കും ഇടയിൽ ഈ ട്രെയിൻ സർവീസ് നടത്തില്ല. കൂടാതെ, ചെന്നൈ-ആലപ്പുഴ ഡെയിലി എക്സ്പ്രസ് ഈ ദിവസങ്ങളിൽ 30 മിനിറ്റ് വൈകിയായിരിക്കും ഓടുക. പ്ലാറ്റ്ഫോം നിർമ്മാണ പ്രവർത്തനങ്ങൾ വേഗത്തിൽ പൂർത്തിയാക്കി സർവീസുകൾ പഴയപടിയാക്കാനാണ് റെയിൽവേയുടെ തീരുമാനം.
