കൊച്ചി കോർപ്പറേഷനിലെ യുഡിഎഫ് സ്ഥാനാർത്ഥികളെ പ്രഖ്യാപിച്ചു
കൊച്ചി കോർപ്പറേഷനിൽ ആകെയുള്ള 74 സീറ്റുകളിൽ 64ഉം കോൺഗ്രസാവും മത്സരിക്കുക. മുസ്ലീം ലീഗ് ആറ് സീറ്റുകളിലും, കേരള കോൺഗ്രസ് 3 സീറ്റുകളിലും ആർഎസ്പി ഒരു സീറ്റിലും മത്സരിക്കും.
കൊച്ചി: തദ്ദേശ തെരഞ്ഞെടുപ്പിൽ കൊച്ചി കോർപ്പറേഷനിലേക്ക് മത്സരിക്കുന്ന യുഡിഎഫ് സ്ഥാനാർത്ഥികളെ പ്രഖ്യാപിച്ചു. ഡിസിസി അധ്യക്ഷൻ ടിജെ വിനോദും യുഡിഎഫ് ജില്ലാ ചെയർമാൻ ഡൊമനിക് പ്രസൻ്റേഷനും കൂടിയാണ് സ്ഥാനാർത്ഥികളെ പ്രഖ്യാപിച്ചത്.
കൊച്ചി കോർപ്പറേഷനിൽ ആകെയുള്ള 74 സീറ്റുകളിൽ 64ഉം കോൺഗ്രസാവും മത്സരിക്കുക. മുസ്ലീം ലീഗ് ആറ് സീറ്റുകളിലും, കേരള കോൺഗ്രസ് 3 സീറ്റുകളിലും ആർഎസ്പി ഒരു സീറ്റിലും മത്സരിക്കും. കോൺഗ്രസ് നിരയിൽ നിന്നും മത്സരത്തിനിറങ്ങുന്ന 48 പേരും പുതുമുഖങ്ങളാണ്. 11 യൂത്ത് കോൺഗ്രസ് പ്രതിനിധികളും മത്സരരംഗത്തുണ്ട്. ജില്ലാ പഞ്ചായത്തിലെ 21 ഡിവിഷനിലും കോൺഗ്രസ് സ്ഥാനാർത്ഥികൾ മത്സരരംഗത്തുണ്ടാവും.
തദ്ദേശ തെരഞ്ഞെടുപ്പിൽ മുൻ കെപിസിസി ജനറൽ സെക്രട്ടറി എൻ.വേണുഗോപാൽ ഐലണ്ട് നോർത്തിൽ മത്സരിക്കും. കെപിസിസി ഭാരവാഹി ദീപ്തി മേരി വർഗീസും സ്ഥാനാർഥി പട്ടികയിലുണ്ട്. 15 മുൻ കൗൺസിലർമാർ മത്സരരംഗത്തുണ്ടെങ്കിലും നിലവിലെ മേയർ സൗമിനി ജെയ്ൻ ഇക്കുറി മത്സരിക്കുന്നില്ല.