'മാധ്യമങ്ങളുടെ പ്രവര്ത്തനം അഭിനന്ദനീയം, പക്ഷേ ഇക്കാര്യങ്ങൾ കൂടി പരിഗണിക്കണം'; അഭ്യർഥനയുമായി ആരോഗ്യ മന്ത്രി
വയനാട് ദുരന്തത്തില് കേരളത്തിലെ മാധ്യമങ്ങള് അഭിനന്ദനാര്ഹമായ നിലയിലാണ് പ്രവര്ത്തിക്കുന്നതെന്നും മന്ത്രി പറഞ്ഞു
 )
തിരുവനന്തപുരം: വയനാട് ഉരുൾപൊട്ടൽ പ്രദേശത്ത് റിപ്പോർട്ട് ചെയ്യുന്ന മാധ്യമപ്രവർത്തകർക്ക് നിർദേശവുമായി ആരോഗ്യമന്ത്രി വീണാ ജോർജ്. വയനാട് ദുരന്തത്തില് കേരളത്തിലെ മാധ്യമങ്ങള് അഭിനന്ദനാര്ഹമായ നിലയിലാണ് പ്രവര്ത്തിക്കുന്നതെന്നും അവർ പറഞ്ഞു. അതേസമയം, എന്താണ് സംഭവിച്ചതെന്ന് കുട്ടികളോട് ചോദിയ്ക്കാതിരിക്കുക, മരണമടഞ്ഞ കൂട്ടുകാരെക്കുറിച്ചോ വീട്ടുകാരെക്കുറിച്ചോ തകര്ന്ന സ്കൂളിനെക്കുറിച്ചോ കുട്ടികളെക്കൊണ്ട് ദയവായി ഈയവസരത്തില് പറയിക്കാതിരിക്കുക, കുഞ്ഞുങ്ങളുടെ ഐഡന്റിറ്റി വെളിപ്പെടുത്തുന്നുണ്ടെങ്കില് അവരുടെ മാതാപിതാക്കളുടേയോ രക്ഷകര്ത്താക്കളുടേയോ അനുവാദത്തോടെ മാത്രം ചെയ്യുക, ഈ വ്യക്തിയുടെ ഈ ബന്ധു മരിച്ചു എന്ന രീതിയില് ദുരന്തത്തിനിരയായവരെക്കുറിച്ച് പറയാതിരിക്കുക തുടങ്ങിയ കാര്യങ്ങൾ കൂടി മാധ്യമങ്ങൾ പരിഗണിക്കണമെന്നും ആരോഗ്യമന്ത്രി അഭ്യർഥിച്ചു.
മന്ത്രിയുടെ ഫേസ്ബുക്ക് കുറിപ്പിന്റെ പൂര്ണരൂപം
ഇതൊരു അഭ്യര്ത്ഥനയാണ്. പൊതുവില് വയനാട് ദുരന്തത്തില് കേരളത്തിലെ മാധ്യമങ്ങള് അഭിനന്ദനാര്ഹമായ നിലയിലാണ് പ്രവര്ത്തിക്കുന്നത്. ഈയൊരു കാര്യം കൂടി ദയവായി പരിഗണിക്കുമല്ലോ.
1. ഏതൊരു ദുരന്തത്തിലും എന്താണ് സംഭവിച്ചതെന്ന് ദയവായി കുട്ടികളോട് ചോദിയ്ക്കാതിരിക്കുക. (കുട്ടികളാണെങ്കിലും മുതിര്ന്നവരാണെങ്കിലും അവരുടെ മനസില് ഈ ദുരന്തം വീണ്ടും ഉറപ്പിക്കുന്നതിനും ഭാവിയില് മാനസിക ബുദ്ധിമുട്ടുകള് ഉണ്ടാക്കുന്നതിനും ഈ ആവര്ത്തനങ്ങള് കാരണമായേക്കാം)
2. മരണമടഞ്ഞ കൂട്ടുകാരെക്കുറിച്ചോ വീട്ടുകാരെക്കുറിച്ചോ തകര്ന്ന സ്കൂളിനെക്കുറിച്ചോ കുട്ടികളെക്കൊണ്ട് ദയവായി ഈയവസരത്തില് പറയിയ്ക്കാതിരിക്കുക.
3. കുഞ്ഞുങ്ങളുടെ ഐഡന്റിറ്റി ഡിസ്ക്ലോസ് ചെയ്യുന്നുണ്ടെങ്കില് അവരുടെ മാതാപിതാക്കളുടേയോ രക്ഷകര്ത്താക്കളുടേയോ അനുവാദത്തോടെ മാത്രം ചെയ്യുക.
4. ഈ വ്യക്തിയുടെ ഈ ബന്ധു മരിച്ചു എന്ന രീതിയില് ദുരന്തത്തിനിരയായവരെക്കുറിച്ച് പറയാതിരിക്കുക. ചിലപ്പോള് അവര് അതറിഞ്ഞിട്ടുണ്ടാകില്ല. ഇങ്ങനെയറിയുന്നത് അവരെ കൂടുതല് സങ്കീര്ണാവസ്ഥകളിലേക്ക് എത്തിക്കും.
