ദന്ത, വായ് ശുചിത്വത്തിന്റെ ഭാഗമായി പ്രതിദിനം മൗത്വാഷ് ഉപയോഗിക്കുന്നവരാണ് പലരും. മുടങ്ങാതെ മൗത്വാഷ് ഉപയോഗിക്കുന്നത് നിങ്ങളുടെ രക്തത്തിലെ പഞ്ചസാരയുടെ അളവ് ഉയർത്തുമെന്ന് പലർക്കും അറിയില്ല. പ്രതിദിനം ചുരുങ്ങിയത് രണ്ട് തവണ മൗത്വാഷ് ഉപയോഗിക്കുന്നവർക്ക് ഇടക്ക് മാത്രം ഉപയോഗിക്കുന്നവരെ അപേക്ഷിച്ച് പ്രമേഹം വരാനുള്ള സാധ്യത 55 ശതമാനം കൂടുതലാണെന്നാണ് പുതിയ പഠനം തെളിയിക്കുന്നത്.
ജേണൽ ഒാഫ് നൈട്രിക് ആസിഡിൽ പ്രസിദ്ധീകരിച്ച പഠനത്തിലാണ് ഇക്കാര്യം പറയുന്നത്. ബാക്ടീരിയയെ പ്രതിരോധിക്കുന്ന ഘടകങ്ങളാണ് മൗത്വാഷിൽ അടങ്ങിയിരിക്കുന്നത്. മൗത്വാഷ് സ്ഥിരമായി ഉപയോഗിക്കുന്നത് വായിൽ ജീവാണുവിന്റെ ഉൽപ്പാദനത്തെ പ്രതികൂലമായി ബാധിക്കുകയും ഇത് നൈട്രിക് ആസിഡ് രൂപപ്പെടുന്നതിന് തടസമാവുകയും ചെയ്യും. ഇത് പോഷണവുമായി ബന്ധപ്പെട്ട ആരോഗ്യപ്രശ്നമായി മാറുകയും ചെയ്യും. രക്തസമ്മർദം വർധിപ്പിക്കുന്നതിനും പ്രമേഹ സാധ്യത വർധിപ്പിക്കുകയും ചെയ്യും. മൂന്ന് വർഷത്തെ പഠനത്തിനും നിരീക്ഷണത്തിനും ശേഷമാണ് ഗവേഷകർ ഇൗ കണ്ടുപിടുത്തത്തിൽ എത്തിയതെന്ന് ഹാർവാഡ് സർവകലാശാലയിലെ ഗവേഷക കൗമുദി ജോഷിപുര പറഞ്ഞു.
അനിയന്ത്രിതമായി മൗത്വാഷ് ഉപയോഗിക്കുന്നത് നല്ലതല്ലെന്ന് നേരത്തെ പഠനങ്ങളിൽ കണ്ടെത്തിയിരുന്നു. ഇൗ പഠനങ്ങളാണ് പുതിയ കണ്ടെത്തലിലേക്ക് നയിച്ചതെന്നും ഗവേഷക പറഞ്ഞു. 40നും 65നും ഇടയിൽ പ്രായമുള്ള 1206 അമിതവണ്ണമുള്ളവരിലാണ് പഠനം നടത്തിയത്. ഇവർക്ക് ഹൃദയസംബന്ധമായോ അസുഖമോ പ്രമേഹമോ ഉണ്ടായിരുന്നില്ല. 43 ശതമാനം പേർ പ്രതിദിനം ഒരു തവണ മൗത്വാഷ് ഉപയോഗിച്ചപ്പോൾ 22 ശതമാനം പേർ രണ്ട് തവണയും ഉപയോഗിച്ചു. രണ്ട് വിഭാഗത്തിലും പ്രമേഹത്തിനുള്ള വർധിച്ച സാധ്യത കണ്ടെത്തി. എന്നാൽ ഇൗ സാധ്യത ഒരു തവണ ഉപയോഗിച്ചവരിൽ കുറഞ്ഞും രണ്ട് തവണ ഉപയോഗിച്ചവരിൽ കൂടിയും കണ്ടെത്തി.
