ബ്ലൂ വെയില് എന്ന കൊലയാളി ഗെയിമിനെക്കുറിച്ചാണ് ഇപ്പോള് ചര്ച്ചകളേറെയും. ഇപ്പോഴിതാ, കേരളത്തിലും ഒരു കൗമാരക്കാരന് ആത്മഹത്യ ചെയ്തത് ബ്ലൂവെയില് ഗെയിമിന് അടിപ്പെട്ടാണെന്ന വിവരം പുറത്തുവന്നിരിക്കുന്നു. ഈ സാഹചര്യത്തില് വായനക്കാര്ക്ക് ബ്ലൂവെയിലിനെക്കുറിച്ചുള്ള സംശയങ്ങള് നിരവധിയാണ് അതിന് തിരുവനന്തപുരം മെഡിക്കല് കോളേജിലെ മനശാസ്ത്രവിഭാഗം മറുപടി നല്കുന്നു...
എന്തിന് കുട്ടികള് ആത്മഹത്യ ചെയ്യുന്നു?
കൗമാര ജീവതത്തെ ഏറെ പ്രതിസന്ധിയിലാക്കുന്നതാണ് ബ്ലൂ വെയില് ഗെയിം. ഒരിക്കല് അകപ്പെട്ടു കഴിഞ്ഞാല് പെട്ടതു തന്നെ. തിരിച്ചുവരാന് ശ്രമിച്ചാല് ഭീഷണിയാകും ഫലം. ഓരോ ടാസ്കുകള്ക്കൊപ്പവും ഇരകളില് നിന്നും ശേഖരിച്ച സ്വകാര്യ വിവരങ്ങളും ചിത്രങ്ങളും ഉപയോഗിച്ചുള്ള ബ്ലാക് മെയ്ലിംഗ് കുട്ടികളെ മാനസികമായി തളര്ത്തുന്നു. പ്രണയം, ലൈംഗികത തുടങ്ങിയ കാര്യങ്ങളില് കുട്ടികളുടെ സ്വകാര്യവിവരങ്ങള് പങ്കുവെയ്ക്കപ്പെടുന്നു. ഇതെല്ലാം രക്ഷിതാക്കളറിയുമെന്ന ഭീതിയാണ് ഗെയിം തുടരുന്നതും അവര് ആത്മഹത്യാ വെല്ലുവിളി ഏറ്റെടുക്കുന്നതിനും കാരണമാകുന്നത്.
