ടിപ്പർ ലോറിയിടിച്ച് വഴിയാത്രക്കാരൻ മരിച്ചു; അപകടം കണ്ട സഹോദരൻ കുഴഞ്ഞ് വീണ് മരിച്ചു
വിവരമറിഞ്ഞ് സമീപത്ത് കട നടത്തുന്ന സഹോദരന് മുസ്തഫ സ്ഥലത്തെത്തി. അപകടം കണ്ട ഇയാൾ ഹൃദയാഘാതത്തെ തുടര്ന്ന് കുഴഞ്ഞ് വീഴുകയും മരിയ്ക്കുകയുമായിരുന്നു
മലപ്പുറം: മലപ്പുറം എടരിക്കോട് ക്ലാരി മൂച്ചിയില് ടിപ്പര് ലോറി ഇടിച്ച് ഒരാള് മരിച്ചു. പരുത്തിക്കുന്നില് മജീദാണ് മരിച്ചത്. ഈ വിവരമറിഞ്ഞ് സ്ഥലത്തെത്തിയ സഹോദരന് മുസ്തഫയും കുഴഞ്ഞ് വീണു മരിച്ചു.
ഇന്ന് രാവിലെയാണ് സംഭവം. കടയിൽ നിന്ന് സാധനങ്ങൾ വാങ്ങി വീട്ടിലേക്ക് പോകുന്നതിനിടയിലാണ് 45കാരനായ മജീദിനെ കരിങ്കല് കയറ്റി വന്ന ടിപ്പര് ലോറി വന്നിടിച്ചത്. ടിപ്പറിനടിയില് മജീദ് കുടുങ്ങിപ്പോവുകയായിരുന്നു. തുടര്ന്ന്, സമീപത്തെ വൈദ്യുതി പോസ്റ്റില് ഇടിച്ചാണ് ടിപ്പര് നിന്നത്.
ഈ വിവരമറിഞ്ഞ് സമീപത്ത് കട നടത്തുന്ന സഹോദരന് മുസ്തഫ സ്ഥലത്തെത്തുകയായിരുന്നു. അപകടം കണ്ട 48കാരനായ മുസ്തഫ ഹൃദയാഘാതത്തെ തുടര്ന്ന് കുഴഞ്ഞ് വീഴുകയും മരിയ്ക്കുകയുമായിരുന്നു.
ഈ സ്ഥലത്ത് നേരത്തെയും പല അപകടങ്ങളും നടന്നിട്ടുണ്ടെന്ന് നാട്ടുകാര് പറഞ്ഞു. വളരെ വീതി കുറഞ്ഞ ഈ റോഡിലൂടെ കാല്നടയാത്രക്കാര് ഏറെ ബുദ്ധിമുട്ടിയാണ് സഞ്ചരിക്കുന്നത്. ഇത് പലപ്പോഴും അപകടങ്ങൾക്ക് കാരണമാകാറുണ്ടെന്നും നാട്ടുകാർ പറഞ്ഞു.