സുരേഷ് സി. പിള്ള എഴുതുന്നു
1883 ല് പോളണ്ടിലെ ശാസ്ത്രജ്ഞരായ Zygmunt Wróblewski യും Karol Olszewski യുമാണ് ആദ്യമായി നൈട്രജന് ദ്രാവകം (liquid nitrogen) ആക്കിയത്. ശാസ്ത്ര ഗവേഷണ ആവശ്യങ്ങള്ക്കും മെഡിക്കല് രംഗത്തും, cryogenics ഗവേഷണ രംഗത്തും ധാരാളമായി ഇത് ഉപയോഗിക്കുന്നു. അരിമ്പാറകള് നീക്കം ചെയ്യാന് ദ്രാവക നൈട്രജന് ഉപയോഗിക്കാറുണ്ട്. മൃഗാശുപത്രി സന്ദര്ശിച്ചിട്ടുള്ളവര് നൈട്രജന് ദ്രാവകം കണ്ടിട്ടുണ്ടാവും. ബീജം തണുപ്പിച്ചു സ്റ്റോര് ചെയ്യാനും ദ്രാവക നൈട്രജന് ഉപയോഗിക്കാറുണ്ട്.
പുക മഞ്ഞ് ഐസ് ക്രീം അഥവാ, ദ്രാവക നൈട്രജന് ചേര്ന്ന ഐസ് ക്രീം. ഈയടുത്താണ് കേരളത്തില് ഇത് വ്യാപകമായത്. അതിനു പിന്നാലെ ഐസ്ക്രീം കഴിച്ചു പുക വായില് കൂടി ഊതി വിടുന്ന പടങ്ങള് സമൂഹ മാധ്യമങ്ങളില് വ്യാപകമായി. തീര്ന്നില്ല. ഇതുമായി ബന്ധപ്പെട്ട് വാര്ത്തകളും വ്യാപകമായി. ചില പത്ര മാധ്യമങ്ങളും, ടെലിവിഷന് ചാനലുകളും ഇതേക്കുറിച്ചുള്ള വാര്ത്തകള് സംപ്രേഷണം ചെയ്തു. ഇത് വിഷമാണെന്നും, ഉപയോഗിക്കരുത് എന്നും വാര്ത്തകള് വന്നു.
സത്യത്തില്, എന്താണ് ഇതിന്റെ അടിസ്ഥാനം? ഈ വാര്ത്തകളില് വാസ്തവമുണ്ടോ?
ആദ്യമായി എന്താണ് ഈ ഐസ് ക്രീം എന്നു നോക്കാം. ദ്രാവക രൂപത്തിലുള്ള നൈട്രജന് (liquid nitrogen) എന്ന വാതകം ചേര്ന്നതാണ് ഈ ഐസ്ക്രീം.
എന്താണ് ദ്രാവക നൈട്രജന് (liquid nitrogen)?
അതറിയണമെങ്കില്, എന്താണ് നൈട്രജന് എന്ന് നോക്കണം. അറ്റോമിക് നമ്പര് 7 ആയതും, N എന്ന അക്ഷരം കൊണ്ട് സൂചിപ്പിക്കുന്നതും, പീരിയോഡിക് ടേബിളിലെ ഏഴാമത്തെ അംഗവും ആണ് നൈട്രജന്. പ്രപഞ്ചത്തില് ഏറ്റവും കൂടുതല് കാണപ്പെടുന്ന ഏഴാമത്തെ മൂലകം. ഭൂമിയിലെ അന്തരീക്ഷത്തില് 78% നൈട്രജന് ഉണ്ട്. കുറച്ചു കൂടി വിശദമാക്കിയാല് അന്തരീക്ഷ വായുവില് 78.09% നൈട്രജനും, 20.95% ഓക്സിജനും, 0.93% ഉത്കൃഷ്ട വാതകങ്ങളും (Noble Gases-ആര്ഗോണ്), 0.04% കാര്ബണ് ഡൈ ഓക്സൈഡും ആണുള്ളത്. അപ്പോള് നമ്മള് ശ്വസിക്കുമ്പോള് ഓക്സിജന്റെ കൂടെ നൈട്രജന് ഗ്യാസും കൂടിയാണ് അകത്തേക്ക് പോകുന്നത്. നമ്മുടെ ശരീരത്തില് ഉള്ള അമിനോ ആസിഡുകളിലും, DN, RNA തുടങ്ങിയ ന്യൂക്ലിക് ആസിഡുകളിലും, ATP (adenosine triphosphate) യിലും എല്ലാം നൈട്രജന് എന്ന മൂലകത്തിന്റെ സാന്നിധ്യം ഉണ്ട്. ശരീര ഭാരത്തിന്റെ ഏകദേശം മൂന്നു ശതമാനം നൈട്രജന് ആണ്.
പറഞ്ഞത നൈട്രജന് വാതകത്തെക്കുറിച്ചാണ്. അപ്പോള് ദ്രാവക നൈട്രജന് എന്നാല് എന്താണ്?
പച്ച വെള്ളത്തിന്റെ തിള നില 100 ഡിഗ്രി സെല്ഷ്യസ് ആണ് എന്നറിയാമല്ലോ? അതു കഴിഞ്ഞാല് വെള്ളം നീരാവി ആകും. 0 ഡിഗ്രി സെല്ഷ്യസില് താഴെ തണുപ്പിച്ചാല് ഐസ് ആകും. അതു പോലെ അന്തരീക്ഷ താപനിലയില് വാതകം ആയ നൈട്രജന്റെ തിളനില -196C ആണ് (പൂജ്യത്തിനും താഴെ -196C! എന്തൊരു തണുപ്പാകും എന്ന് ആലോചിച്ചു നോക്കൂ).
1883 ല് പോളണ്ടിലെ ശാസ്ത്രജ്ഞരായ Zygmunt Wróblewski യും Karol Olszewski യുമാണ് ആദ്യമായി നൈട്രജന് ദ്രാവകം (liquid nitrogen) ആക്കിയത്. ശാസ്ത്ര ഗവേഷണ ആവശ്യങ്ങള്ക്കും മെഡിക്കല് രംഗത്തും, cryogenics ഗവേഷണ രംഗത്തും ധാരാളമായി ഇത് ഉപയോഗിക്കുന്നു. അരിമ്പാറകള് നീക്കം ചെയ്യാന് ദ്രാവക നൈട്രജന് ഉപയോഗിക്കാറുണ്ട്. മൃഗാശുപത്രി സന്ദര്ശിച്ചിട്ടുള്ളവര് നൈട്രജന് ദ്രാവകം കണ്ടിട്ടുണ്ടാവും. ബീജം തണുപ്പിച്ചു സ്റ്റോര് ചെയ്യാനും ദ്രാവക നൈട്രജന് ഉപയോഗിക്കാറുണ്ട്.
ഈ -196C എന്നാല് ഭയങ്കര തണുപ്പല്ലേ? അത് അപകടം അല്ലെ?
അതെ. വേണ്ടത്ര സുരക്ഷാ ക്രമീകരണങ്ങള് ഇല്ലാതെ ഒരിക്കലും ദ്രാവക നൈട്രജന് കൈകാര്യം ചെയ്യരുത്. ഇതിനു വേണ്ടി പ്രത്യേക തരം ഗ്ലൗസുകള് ലഭ്യമാണ്. ഒരിക്കലും ദ്രാവക രൂപത്തില് കുടിക്കരുത്. റോയല് സൊസൈറ്റി ഓഫ് കെമിസ്ട്രി ഫെല്ലോ ആയ പ്രൊഫ. John Emsley പറയുന്നത് 'If you drank more than a few drops of liquid nitrogen, certainly a teaspoon, it would freeze, and become oslid and brittle like glass. Imagine if that happened in the alimentary canal or the stomach. 'The liquid alos quickly picks up heat, boils and becomes a gas, which could cause damage such as perforations or cause a stomach to burst, (ബിബിസി, Who What Why: How dangerous is liquid nitrogen, 9 October 2012 ).
അതായത് ഒരു സ്പൂണ് ദ്രാവക നൈട്രജന് കുടിച്ചാല്, ആമാശയം തണുത്തു 'പൊടിഞ്ഞു' പോകാം എന്ന്. ഇങ്ങനെ ഒരു സംഭവം ഉണ്ടായിട്ടുമുണ്ട്. ഗാബി സ്കാന്ലന് എന്ന ബ്രിട്ടീഷ് ടീന് കൗമാരക്കാരന് മദ്യത്തിന്റെ കൂടെ ദ്രാവക നൈട്രജന് കുടിച്ചു. തുടര്ന്ന് വയറില് ഗുരുതരമായി അപകടം സംഭവിച്ചു. സര്ജറി (gastrectomy - the surgical removal of part of the stomach) ചെയ്യേണ്ടി വന്നു. ഇത് ബിബിസി, ഗാര്ഡിയന് ഉള്പ്പെടെ പല പത്രങ്ങളും റിപ്പോര്ട്ട് ചെയ്തതാണ്. (കൂടുതല് വായനയ്ക്ക് (Why Liquid Nitrogen Is Dangerous, Time magazine, Olivia B. Oct. 10, 2012).
ഇനി ഐസ്ക്രീമിന്റെ കാര്യം. അത് അപകടം ആണോ?
യു. കെ യിലെ ബ്രിസ്റ്റള് യൂണിവേഴ്സിറ്റി പ്രൊഫസര് പീറ്റര് ബര്ഹാം Peter Barham പറയുന്നത് കേള്ക്കൂ, ' ലിക്വിഡ് നൈട്രജന് നിരുപദ്രവകാരിയായ നൈട്രജന് വാതകത്തിന്റെ ദ്രാവക രൂപം ആണ്'.
അദ്ദേഹം തുടരുന്നു: It is also essential that all the liquid has evaporated before any food or drink that has been prepared with liquid nitrogen is used. അതായത് ദ്രാവക രൂപത്തിലുള്ള ലിക്വിഡ് നൈട്രജന് മുഴുവന് ബാഷ്പം ആയി പോയതിനു ശേഷം കഴിക്കുന്നതാണ് ഉചിതം. (BBC, Who What Why: How dangerous is liquid nitrogen?9 October 2012).
വ്യക്തിപരമായി നടത്തിയ അന്വേഷണത്തില്, മാരകമായ ഒരു അപകടങ്ങളും ലിക്വിഡ് നൈട്രജന് ഐസ് ക്രീം കഴിച്ചു റിപ്പോര്ട്ട് ചെയ്തിട്ടില്ല എന്നാണ് കണ്ടെത്താന് കഴിഞ്ഞത്. ബാഷ്പം ആകാതെ ലിക്വിഡ് നൈട്രജന് നേരിട്ടു വായില് ഇട്ടാല് പൊള്ളല് (തണുപ്പ് കൊണ്ടുള്ള പൊള്ളല് -cold burn hazard) ഉണ്ടാകാനുള്ള സാദ്ധ്യത ഉണ്ട്. ഒരിക്കലും മദ്യത്തിന്റെ കൂടെ ഒഴിച്ചു കഴിക്കരുത്. മുകളിലത്തെ Gaby Scanlon ന്റെ കഥ ഓര്ക്കുക. ഐസ് ക്രീം കഴിക്കുന്നതും വളരെ സാവധാനം നിയന്ത്രിതമായി കഴിക്കുക. സ്പൂണില് എടുത്തു നൈട്രജന് മുഴുവന് ബാഷ്പം ആയി പോയതിനു ശേഷം കഴിക്കുന്നതാണ് ഉചിതം. അല്ലെങ്കില് ചിലപ്പോള് വായില് cold burn ഉണ്ടാകാം.
അതായത് കഠിനമായ തണുപ്പു കൊണ്ട് ഉണ്ടാകാവുന്ന അപകടങ്ങളെ ഇതുകാരണം ഉള്ളൂ. അതല്ലാതെ നമ്മള് ശ്വസിച്ചു കൊണ്ടിരിക്കുന്ന നൈട്രജന്, ഐസ് ക്രീമിന്റെ കൂടെ മുകളില് പറഞ്ഞ പോലെ, ശുചിയായ സാഹചര്യങ്ങളില്, സുരക്ഷയോടെ ഉണ്ടാക്കിയ ഐസ്ക്രീം, നിയന്ത്രിതമായി അകത്തേക്കു കഴിക്കുന്നതില് വേറെ കുഴപ്പങ്ങള് ഒന്നുമില്ല.
കൂടുതല് വായനയ്ക്ക്
Who What Why: How dangerous is liquid nitrogen?BBC, 9 October 2012
Why Liquid Nitrogen Is Dangerous, Time magazine, Olivia B. Oct. 10, 2012
Warning over liquid nitrogen drinks after girl loses stomach, The Telegraph, Rosa Silverman 08 Oct 2012
.........................................................................
ഡോ.സുരേഷ് സി പിള്ള
കോട്ടയം കറുകച്ചാൽ (ചമ്പക്കര) സ്വദേശി. അയർലണ്ടിലെ (ഡബ്ലിൻ) ട്രിനിറ്റി കോളേജിൽ നിന്ന് PhD. അമേരിക്കയിലെ കാലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജി യിൽ നിന്നും പോസ്റ്റ് ഡോക്ടറൽ ഗവേഷണം. ഇപ്പോള്, അയർലണ്ടിലെ ഇൻസ്റ്റിറ്റ്യൂട്ട് ഓഫ് ടെക്നോളജി സ്ലൈഗോ യിലെ നാനോടെക്നോളജി ആൻഡ് ബയോ എഞ്ചിനീയറിംഗ് ഗവേഷണ വിഭാഗം മേധാവി. നൂറിലധികം ജേർണൽ ആർട്ടിക്കിൾസ്/ ഗവേഷണ റിപ്പോർട്ടുകൾ പ്രസിദ്ധീകരിച്ചു.. രണ്ട് US പേറ്റന്റും, ഒരു UK പേറ്റന്റും അവാർഡ് ചെയ്തിട്ടുണ്ട്. മലയാളത്തിൽ, 'തന്മാത്രം" എന്ന പുസ്തകം പ്രസിദ്ധീകരിച്ചു.
