'പൊലീസ് നായ പ്രയോഗം ജനാധിപത്യപരം'; വിശദീകരണവുമായി ബി ഗോപാലകൃഷ്ണൻ
ഐജി മനോജ് എബ്രഹാമിനെതിരായ പൊലീസ് നായ പരാമർശത്തിൽ വിശദീകരണവുമായി ബിജെപി നേതാവ് ബി ഗോപാലകൃഷ്ണൻ. പൊലീസ് നായ പ്രയോഗം ജനാധിപത്യപരമാണ്, പൊലീസ് നായ എന്നുള്ളത് അവഹേളിക്കുന്ന വാക്കല്ലെന്നും ബി ഗോപാലകൃഷ്ണൻ
തിരുവല്ല: ഐജി മനോജ് എബ്രഹാമിനെതിരായ ' പൊലീസ് നായ ' പരാമർശത്തിൽ വിശദീകരണവുമായി ബിജെപി നേതാവ് ബി ഗോപാലകൃഷ്ണൻ. ' പൊലീസ് നായ ' എന്ന പ്രയോഗം ജനാധിപത്യപരമാണ്, ' പൊലീസ് നായ ' എന്നുള്ളത് അവഹേളിക്കുന്ന വാക്കല്ലെന്നും ബി ഗോപാലകൃഷ്ണൻ പറഞ്ഞു. പ്രയോഗത്തിലൂടെ മനോജ് എബ്രഹാമിന്റെ സമീപനത്തെയാണ് ചൂണ്ടിക്കാട്ടിയതെന്ന് ബി ഗോപാലകൃഷ്ണൻ വിശദമാക്കി.
പ്രധാനമന്ത്രി ഉൾപ്പടെ ബിജെപി കേന്ദ്ര സംസ്ഥാന നേതാക്കളെ സിപിഎം മോശമായ രീതിയിൽ അവഹേളിച്ചിട്ടുണ്ടെന്നും അദ്ദേഹം കൂട്ടിച്ചേര്‍ത്തു. ' പൊലീസ് നായ ' പ്രയോഗത്തില്‍ കേസ് നിലനില്‍ക്കില്ലെന്നും ബി ഗോപാലകൃഷ്ണൻ അവകാശപ്പെട്ടു.
ശബരിമല വിഷയത്തിൽ ബിജെപി നടത്തിയ ഐജി ഓഫീസ് മാർച്ച് ഉദ്ഘാടനം ചെയ്തപ്പോഴാണ് ഗോപാലകൃഷ്ണൻ ഐജിയെ ' പൊലീസ് നായ ' യെന്ന് വിളിച്ച് അധിക്ഷേപിച്ചത്. പ്രമോഷൻ കിട്ടണമെങ്കിൽ സെൻട്രൽ ട്രിബ്യൂണലിൽ പോയി നിൽക്കേണ്ടി വരുമെന്നും ഗോപാലകൃഷ്ണൻ പറഞ്ഞിരുന്നു. ഐജി മനോജ് എബ്രഹാമിനെ അധിക്ഷേപിച്ചതിനും ഭീഷണിപ്പെടുത്തിയതിനും ബിജെപി നേതാവ് ബി. ഗോപാലകൃഷ്ണനെതിരെ കൊച്ചി സെൻട്രൽ പൊലീസ് കേസെടുത്തിരുന്നു.
