കോലഞ്ചേരി കടയിരുപ്പ് ഭാഗത്ത് ഒരു വീടിനുള്ളിൽ കയറിയ കൂറ്റൻ മൂർഖൻ പാമ്പിനെ പിടികൂടി. ഇര വിഴുങ്ങി അലമാരയുടെ അടിയിൽ ഒളിച്ചിരുന്ന പാമ്പിനെ കിഴക്കമ്പലം സ്വദേശിയായ ജോബി വർഗീസാണ് പിടികൂടിയത്.
കോലഞ്ചേരി: കടയിരുപ്പ് നരച്ചിലംകോട് ഭാഗത്ത് വീടിനുള്ളിൽ കയറിയ കൂറ്റൻ മൂർഖൻ പാമ്പിനെ പിടികൂടി. കഴിഞ്ഞ ദിവസം രാത്രിയിലാണ് സംഭവം. ഇര വിഴുങ്ങിയ നിലയിലായിരുന്ന പാമ്പ് വീടിനുള്ളിലെ അലമാരയുടെ അടിയിൽ ഒളിച്ചിരിക്കുകയായിരുന്നു. ഈ സമയം വീട്ടമ്മ മാത്രമാണ് വീടിനുള്ളിൽ ഉണ്ടായിരുന്നത്.
അലമാരയ്ക്കടിയിൽ പാമ്പിനെ കണ്ടതോടെ വീട്ടമ്മ പരിഭ്രാന്തയാകുകയും നാട്ടുകാരെ വിവരമറിയിക്കുകയുമായിരുന്നു. തുടർന്ന് വിവരമറിഞ്ഞെത്തിയ കിഴക്കമ്പലം സ്വദേശി ജോബി വർഗീസാണ് ഏറെ പണിപ്പെട്ട് പാമ്പിനെ പിടികൂടിയത്. പാമ്പിനെ പിടികൂടി സുരക്ഷിതമായി മാറ്റിയതോടെയാണ് വീട്ടുകാർക്കും നാട്ടുകാർക്കും ആശ്വാസമായത്. മഴക്കാലം അടുക്കുന്നതോടെ പാമ്പുകൾ ജനവാസ മേഖലകളിലേക്കും വീടുകളിലേക്കും കയറാൻ സാധ്യതയുള്ളതിനാൽ ജാഗ്രത പാലിക്കണമെന്ന് അധികൃതർ നിർദ്ദേശിക്കുന്നു.
