കൃഷി മന്ത്രി വി.എസ് സുനില് കുമാര്, ജലവിഭവ വകുപ്പ് മന്ത്രി മാത്യു ടി തോമസ്, ആറന്മുള എംഎല്എ വീണാ ജോര്ജ്, റാന്നി എം.എല്.എ രാജു എബ്രഹാം എന്നിവര് വിത്ത് വിതയ്ക്കുന്ന ചടങ്ങില് പങ്കെടുത്തു. വന് ജനാവലിയുടെ സാന്നിധ്യത്തിലാണ് ചടങ്ങ് നടന്നത്. ഒരുകോടി 53 ലക്ഷം രൂപയാണ് ഇതിനായി ചിലവഴിക്കേണ്ടി വരികയെന്ന് മുഖ്യമന്ത്രി പറഞ്ഞു.
ആറന്മുള വിമാനത്താവളത്തിനായി സര്ക്കാര് നടത്തിയ വ്യവസായ മേഖലാ പ്രഖ്യാപനം നിലനില്ക്കേയാണ് സര്ക്കാര് ആറന്മുള പുഞ്ചയില് വിത്തിറക്കുന്നത്. ആയിരം ഏക്കര് വരുന്നതാണ് ആറന്മുള പുഞ്ച. വിമാനത്താവളം, പാലം നിര്മ്മാണം തുടങ്ങിയ വിഷയങ്ങള് കാരണം പ്രദേശത്ത് കൃഷി ഇറക്കുന്നത് വര്ഷങ്ങളായി നിലച്ചിരിക്കുകയായിരുന്നു
ആറന്മുളയില് ഒരു കാരണവശാലും വിമാനത്താവളം അനുവദിക്കില്ലെന്ന് മുഖ്യമന്ത്രി പിണറായി വിജയന് പറഞ്ഞു. പദ്ധതിക്കായി നടത്തിയ വ്യവസായ മേഖലാ പ്രഖ്യാപനം റദ്ദാക്കാനുള്ള നടപടികള് ആരംഭിക്കും. വിമാനത്താവള പദ്ധതി പ്രദേശത്തെ മണ്ണിട്ട് നികത്തിയ കോഴിത്തോട് പുനസ്ഥാപിക്കും. കോടതിയില് കെജിഎസിന്റെ വാദം നടക്കുന്നുണ്ട് . അതിനര്ത്ഥം സര്ക്കാര് നിലപാട് മാറിയെന്നല്ലെന്നും പിണറായി പറഞ്ഞു.
