കുംഭമാസ പൂജയ്ക്ക് നാളെ നട തുറക്കും: ശബരിമലയില് നിരോധനാജ്ഞ വേണമെന്ന് പോലീസ്
ശബരിമല യുവതി പ്രവേശന വിഷയത്തിൽ സുപ്രീംകോടതി വിധി പറയുന്നത് മാറ്റിയ സാഹചര്യത്തിൽ കുംഭമാസ പൂജാവേളയിലും സന്നിധാനത്ത് പ്രശ്നങ്ങൾക്കുള്ള സാധ്യതയുണ്ടെന്നാണ് പോലീസിന്റെ നിരീക്ഷണം
പത്തനംതിട്ട: കുംഭമാസ പൂജാവേളയിലും ശബരിമലയിൽ നിരോധനാജ്ഞ പ്രഖ്യാപിക്കണമെന്ന് പോലീസ്. ഇന്ന് അർധരാത്രി മുതൽ ഫെബ്രുവരി 17 വരെ നിരോധനാജ്ഞ പ്രഖ്യാപിക്കണമെന്നാണ് ജില്ല കളക്ടർക്ക് നൽകിയ റിപ്പോർട്ടിൽ ജില്ലാ പോലീസ് മേധാവി ആവശ്യപ്പെട്ടത്. എന്നാൽ നിരോധനാജ്ഞ പ്രഖ്യാപിക്കുന്ന കാര്യത്തിൽ അന്തിമ തീരുമാനം എടുത്തിട്ടില്ലെന്ന് കളക്ടർ മാധ്യമങ്ങളെ അറിയിച്ചു.
ശബരിമല യുവതി പ്രവേശന വിഷയത്തിൽ സുപ്രീംകോടതി വിധി പറയുന്നത് മാറ്റിയ സാഹചര്യത്തിൽ കുംഭമാസ പൂജാവേളയിലും സന്നിധാനത്ത് പ്രശ്നങ്ങൾക്കുള്ള സാധ്യതയുണ്ടെന്നാണ് പോലീസിന്റെ നിരീക്ഷണം. കുംഭമാസ പൂജയ്ക്കായി ചൊവ്വാഴ്ചയാണ് ശബരിമല നട തുറക്കുന്നത്. 17 വരെ ദർശനം ഉണ്ടാകും.