ദേശവിരുദ്ധതയെന്ന് ആരോപണം; കോമേഡിയൻ കുനാൽ കമ്രയുടെ ഷോ റദ്ദാക്കി
- വിദ്യാർത്ഥികളുടെ കത്ത് ലഭിച്ചതിനെത്തുടർന്ന് യൂണിവേഴ്സിറ്റി വൈസ് ചാൻസലർ പരിപാടി റദ്ദാക്കിയതായി അറിയിക്കുകയായിരുന്നു.
ഗുജറാത്ത്: കോമഡി താരം കുനാൽ കമ്രയുടെ ഷോ വഡോദര യൂണിവേഴ്സിറ്റി റദ്ദ് ചെയ്തു. ഷോയിലുടനീളം നിറ‍ഞ്ഞു നിൽക്കുന്നത് ദേശവിരുദ്ധതയാണെന്ന പൂർവ്വവിദ്യാർത്ഥികളുടെ ആരോപണമാണ് കാരണം. ഇക്കാര്യമുന്നയിച്ച് പൂർവ്വവിദ്യാർത്ഥികൾ യൂണിവേഴ്സിറ്റിക്ക് കത്തയിച്ചിരുന്നു. ആഗസ്റ്റ് 11 ന് ഒരു പ്രാദേശിക സംഘടനയാണ് ഷോ നടത്താൻ വേണ്ടി യൂണിവേഴ്സിറ്റി ഓഡിറ്റോറിയം ബുക്ക് ചെയ്തത്. എന്നാൽ വിദ്യാർത്ഥികളുടെ കത്ത് ലഭിച്ചതിനെത്തുടർന്ന് ശനിയാഴ്ച യൂണിവേഴ്സിറ്റി വൈസ് ചാൻസലർ പരിപാടി റദ്ദാക്കിയതായി അറിയിക്കുകയായിരുന്നു.
ഇത്തരം ദേശവിരുദ്ധ പരിപാടികൾ ഗുജറാത്തിലെ ഏറ്റവും വലിയ യൂണിവേഴ്സിറ്റിയിൽ അവതരിപ്പിക്കുന്നതു വഴി എന്ത് സന്ദേശം കൈമാറാനാണ് ഇവരെപ്പോലുള്ളവർ ആഗ്രഹിക്കുന്നത്? പൂർവ്വ വിദ്യാർത്ഥികൾ കത്തിലൂടെ ചോദിക്കുന്നു. ദേശീയഗാനത്തെ പരിഹസിക്കുകയാണ് കുനാൽ കമ്ര ചെയ്യുന്നതെന്ന് ഇവർ ആരോപിക്കുന്നു. മാത്രമല്ല വിഭാഗീയതെയും ഭിന്നിപ്പിനെയും പ്രോത്സാഹിപ്പിക്കുകയും ചെയ്യുന്നു. എന്നാൽ തന്നെ ഇതൊന്നും ബാധിക്കുന്നില്ല എന്നാണ് കുനാൽ സംഭവത്തെക്കുറിച്ച് പ്രതികരിച്ചത്.
