ഖത്തറിൽ മലയാളി എഞ്ചിനിയർ സ്വിമ്മിങ് പൂളിൽ മുങ്ങി മരിച്ചു. ഹമദ് ആശുപത്രിയിൽ നെറ്റവർക്ക് എഞ്ചിനിയറായിരുന്ന കോഴിക്കോട് പന്തീരാങ്കാവ് സ്വദേശി മനക്കടവ് അഹമ്മദ് ഷഫീഖാണ് മരിച്ചത്. സ്വിമ്മിങ് പൂളിൽ കുളിക്കുന്നതിനിടെ ഹൃദയാഘാതം ഉണ്ടായതാണ് മരണകാരണമെന്നാണ് സൂചന. ഒരു മാസം മുമ്പാണ് അഹമ്മദ് ഷഫീഖ് ഹമദ് ആശുപത്രിയിൽ ജോലിയിൽ പ്രവേശിച്ചത്. ഭാര്യ നാട്ടിൽ ഒരു പെൺകുഞ്ഞിന് ജന്മം നൽകിയ അതെദിവസമായിരുന്നു ദുരന്തം. നടപടികൾ പൂർത്തിയാക്കിയ ശേഷം മൃതദേഹം നാട്ടിലെത്തിക്കുമെന്ന് ബന്ധുക്കൾ അറിയിച്ചു.