1.63 ലക്ഷം കോടി രൂപയുടെ പിന്‍ബലത്തിലാണ് മുകേഷ് അംബാനി ഒന്നാംസ്ഥാനം നിലനിര്‍ത്തിയത്. തൊട്ടുപിന്നില്‍ സണ്‍ ഫാര്‍മയുടെ ദിലീപ് സംഗ്വിയാണ് ഇന്ത്യയിലെ ഏറ്റവുംവലിയ രണ്ടാമത്തെ സമ്പന്നന്‍. ആസ്തി 1.21 ലക്ഷം കോടി രൂപ. ചൈന ആസ്ഥാനമായ ഹുരൂണ്‍മാസികയുടെ 2016 ലെ ആഗോള സമ്പന്നരുടെ പട്ടികയില്‍ ലുലു ഗ്രൂപ്പ് മേധാവി എം.എ.യൂസഫലിയാണ് മലയാളികളില്‍ ഏറ്റവും സമ്പന്നനായി ഇടംപിടിച്ചിട്ടുള്ളത്. 36,600 കോടി രൂപയുടെ ആസ്തിയുള്ള അദ്ദേഹം ഇന്ത്യയിലെ സമ്പന്നരില്‍ 16ാം സ്ഥാനത്താണുള്ളത്. വിദേശത്ത് വസിക്കുന്ന ഇന്ത്യാക്കാരില്‍ മൂന്നാം സ്ഥാനവും യൂസഫലിക്കാണ്. ഇന്ത്യക്ക് പുറത്തുള്ള സമ്പന്നരില്‍ ഒന്നാം സ്ഥാനത്ത് എസ്.പി. ഹിന്ദുജയും രണ്ടാം സ്ഥാനത്ത് ലക്ഷ്മി മിത്തലും നിലകൊള്ളുന്നു. ആര്‍.പി. ഗ്രൂപ്പ് ചെയര്‍മാന്‍ രവി പിള്ളയാണ് 18,800 കോടി രൂപയുടെ ആസ്തിയുമായി തൊട്ടുപിന്നില്‍. ജെംസ് ഗ്രൂപ്പ്ചെയര്‍മാന്‍ സണ്ണി വര്‍ക്കി (14,200 കോടി രൂപ), ഇന്‍ഫോസിസിന്റെ എസ്. ഗോപാലകൃഷ്ണന്‍ (8,400 കോടി), ശോഭാഗ്രൂപ്പ് ചെയര്‍മാന്‍ പി.എന്‍.സി മേനോന്‍ (7,000 കോടി) എന്നിവരാണ് മൂന്ന് മുതല്‍ അഞ്ച് വരെ സ്ഥാനങ്ങളില്‍. 
ഇത് ആദ്യമായി പതജ്ഞലി ഗ്രൂപ്പ് സി.ഇ.ഒ. ആചാര്യ ബാലകൃഷ്ണ 25,600 കോടി രൂപയുടെ ആസ്തിയുമായി പട്ടികയില്‍ 26ാമതായി ഇടം പിടിച്ചു.