സ്പോര്ട്സ് ബൈക്കില് റോഡില് അഭ്യാസം കാണിച്ച യുവാക്കളെ പൊലീസ് വെടിവച്ച് തുരത്തി>>> വീഡിയോ
ബോസ്റ്റണ്: റോഡില് അനാവശ്യ അഭ്യാസം കാണിച്ച് മറ്റ് വാഹനങ്ങള്ക്ക് തടസമുണ്ടാക്കുകയും ഗതാഗതക്കുരുക്ക് ഉണ്ടാക്കുകയും ചെയ്ത യുവാക്കളെ പൊലീസ് വെടിവച്ച് തുരത്തി. പൊലീസ് വെടിവയ്പില് യുവാക്കളില് ഒരാളുടെ കാലിന് വെടിയേറ്റിട്ടുണ്ട്. മുപ്പതോളം പേരടങ്ങുന്ന സംഘമാണ് സ്പോര്ട്സ് ബൈക്കും മണലിലും ചെളിയിലും ഓടിക്കുന്ന ബൈക്കുകളും ഉപയോഗിച്ചാണ് യുവാക്കളുടെ സംഘം നടുറോഡില് അഭ്യാസം തുടങ്ങിയത്.
ആളുകള്ക്ക് അപകടമുണ്ടാക്കുന്ന രീതിയില് യുവാക്കളുടെ അശ്രദ്ധമായ രീതിയിലുള്ള അഭ്യാസം കൂടിയതോടെയാണ് സായുധ സേന കളത്തിലിറങ്ങിയത്. ആദ്യം പൊലീസ് മുന്നറിയിപ്പ് നല്കിയെങ്കിലും യുവാക്കള് അത് പരിഗണിക്കാതെ അഭ്യാസം തുടരുകയായിരുന്നു. പിന്നീടാണ് ഗത്യന്തമില്ലാതെ പൊലീസ് വെടിവയ്ച്ചത്. പൊലീസ് വെടിയുതിര്ത്തതോടെ യുവാക്കള് ബൈക്കുപേക്ഷിച്ച് പല വഴി ചിതറിയോടി. ഇരുപത് ബൈക്കുകള് പിടിച്ചെടുത്ത പൊലീസ് അഞ്ച് പേരെ അറസ്റ്റ് ചെയ്തു. സംഭവത്തില് പൊലീസ് അന്വേഷണം ആരംഭിച്ചു.
മുഖം മറച്ച് ഹെല്മെറ്റ് പോലും ധരിക്കാതെയായിരുന്നു യുവാക്കളില് പലരും ബൈക്ക് ഓടിച്ചിരുന്നത്. ബോസ്റ്റണിലെ എക്സ്പ്രസ് ഹൈവേയിലായിരുന്നു യുവാക്കളുടെ അഭ്യാസം. അഭ്യാസ പ്രകടനം നടത്തിയ യുവാക്കള് വീഡിയോ എടുക്കാന് ശ്രമം നടത്തിയിരുന്നു. ഇവര് തന്നെ ചിത്രീകരിച്ച ദൃശ്യങ്ങള് സംഭവത്തിന്റെ ഗൗരവം വെളിപ്പെടുത്തുന്നതാണ്.