പ്രധാനമന്ത്രി ഉജ്ജ്വല യോജന പദ്ധതി: എല്ലാ പാവപ്പെട്ടവർക്കും സൗജന്യമായി പാചകവാതകം നൽകും
പ്രധാനമായും ഗ്രാമപ്രദേശങ്ങളിലെ സ്ത്രീകൾക്കാണ് ഇതിന്റെ പ്രയോജനം ലഭിക്കുക. പ്രധാനമന്ത്രിയുടെ അധ്യക്ഷതയിൽ ചേർന്ന സാമ്പത്തിക കാര്യ മന്ത്രിസഭാ സമിതി പദ്ധതിക്ക് അംഗീകാരം നൽകി.
ദില്ലി: 2016 ൽ ആവിഷ്കരിച്ച പ്രധാനമന്ത്രി ഉജ്ജ്വല യോജന പദ്ധതി വിപുലീകരിച്ച് എല്ലാ പാവപ്പെട്ട വീടുകളിലും സൗജന്യ പാചക വാതകം എത്തിക്കാനൊരുങ്ങി കേന്ദ്ര സർക്കാർ. പ്രധാനമായും ഗ്രാമപ്രദേശങ്ങളിലെ സ്ത്രീകൾക്കാണ് ഇതിന്റെ പ്രയോജനം ലഭിക്കുക. പ്രധാനമന്ത്രിയുടെ അധ്യക്ഷതയിൽ ചേർന്ന സാമ്പത്തിക കാര്യ മന്ത്രിസഭാ സമിതി പദ്ധതിക്ക് അംഗീകാരം നൽകി.
ദാരിദ്ര്യരേഖയ്ക്ക് താഴെയുള്ള അഞ്ച് ലക്ഷത്തോളം ഗ്രാമീണ സ്ത്രീകൾക്ക് സൗജന്യമായി പാചകവാതകം നൽകുന്ന പദ്ധതിയായിരുന്നു 2016 ൽ ആവിഷ്കരിച്ച ഉജ്ജ്വല യോജന പദ്ധതി. വിപുലീകരിക്കുന്നതിന്റെ ഭാഗമായി ആദിവാസി സ്ത്രീകളെയും പട്ടികജാതി പട്ടികവർഗ വിഭാഗത്തിലെ സ്ത്രീകളെയും ഉജ്ജ്വല പദ്ധതിയിൽ ഉൾപ്പെടുത്തിയിട്ടുണ്ട്. പാചകവാതകം എല്ലാ വീടുകളിലും എത്തിക്കുക എന്നതാണ് സർക്കാർ ഇതിലൂടെ ലക്ഷ്യമാക്കുന്നതെന്നും കേന്ദ്ര പെട്രോളിയ വകുപ്പ് മന്ത്രി ധർമേന്ദ്ര പ്രധാൻ പറഞ്ഞു.
