ആറളം: കണ്ണൂര് ആറളം ഫാമിലേക്കുള്ള തൂക്കുപാലം തകര്ന്ന് തൊഴിലാളി സ്ത്രീകള് പുഴയില് വീണു. കരയോട് ചേര്ന്ന ഭാഗത്ത് വെള്ളം കുറവായതിനാല് വലിയ അപകടം ഒഴിവായി. കൊക്കോട് പൂവത്തിൻകണ്ടി പ്രദേശങ്ങളെ ആറളം ഫാമുമായി ബന്ധിപ്പിക്കുന്ന ഏക തൂക്കുപാലമാണ് തകർന്നത്.
ആറളം ഫാമിലേക്ക് തൊഴിലാളി സ്ത്രീകൾ പോകുന്നതിനിടെയാണ് തൂക്കുപാലം തകർന്നത്. പാലത്തിന്റെ ഇരുമ്പുവടം പൊട്ടി തൊഴിലാളികളായ ഓമനയും മാധവിയും പുഴയിലേക്ക് വീഴുകയായിരുന്നു. ഇരുമ്പ് വടവും മുളപ്പടികളും ഉപയോഗിച്ച് 20 വർഷം മുമ്പ് നിര്മ്മിച്ച പാലമാണിത്.
തൊഴിലാളികളുടെ ശമ്പള വിഹിതം ഉപയോഗിച്ചാണ് ആറളം പഞ്ചായത്ത് പാലത്തിന്റെ അറ്റകുറ്റപ്പണികൾ നടത്തിയിരുന്നത്. എന്നാല് കഴിഞ്ഞ രണ്ടുവർഷമായി ഇതു മുടങ്ങി. പലവട്ടം തൊഴിലാളികൾ തദ്ദേശസ്ഥാപനങ്ങളെ സമീപിച്ചെങ്കിലും ഒരു നടപടിയുമുണ്ടായില്ല . ആകെയുള്ള പാലം തകർന്നതോടെ കിലോമീറ്ററുകൾ ചുറ്റിയാണ് തൊഴിലാളികൾ ഇപ്പോൾ ആറളം ഫാമിലേക്ക് പോകുന്നത്.
