കണ്ണൂര്‍: പാനൂരിനടുത്ത് ചെണ്ടയാട് വരപ്രയില്‍ മൂന്ന് സിപിഎം പ്രവര്‍ത്തകര്‍ക്ക് വെട്ടേറ്റു. മൂന്നു പേരെയും കോഴിക്കോട് മെഡിക്കല്‍ കോളേജില്‍ പ്രവേശിപ്പിച്ചു. അശ്വന്ത്- 24, രജിത്ത്-28, അതുല്‍-24 എന്നിവര്‍ക്കാണ് വെട്ടേറ്റത്. ബിജെപി പ്രവര്‍ത്തകരാണ് അക്രമത്തിന് പിന്നാലെന്ന് സിപിഎം നേതൃത്വം ആരോപിച്ചു.

നവവല്‍സരാഘോഷ പരിപാടിയില്‍ പങ്കെടുത്തു മടങ്ങുകയായിരുന്നവരെ യാതൊരു കാരണവുമില്ലാതെ അക്രമിക്കുകയായിരുന്നുവെന്ന് സിപിഎം നേതൃത്വം പറഞ്ഞു. ഇന്ന് പുലര്‍ച്ചെ മൂന്ന് മണിയോടെയാണ് സംഭവം. അക്രമം നടന്ന ഉടന്‍ ഇവരെ തലശ്ശേരി സഹകരണ ആശുപത്രിയില്‍ എത്തിച്ചെങ്കിലും പരുക്ക് ഗുരുതരമായതിനാല്‍ ഇവരെ കോഴിക്കോട് മെഡിക്കല്‍ കോളേജിലേക്ക് മാറ്റുകയായിരുന്നു. പ്രദേശത്ത് പൊലീസ് കാവല്‍ ശക്തമാക്കിയിട്ടുണ്ട്.