കൊച്ചി: എന്സിപി സംസ്ഥാന അധ്യക്ഷന് ഉഴവൂര് വിജയന്(65) അന്തരിച്ചു. ഹൃദയ, ഉദര സംബന്ധ അസുഖങ്ങളെ തുടര്ന്ന് ഈ മാസം 11 മുതല് കൊച്ചിയിലെ സ്വകാര്യ ആശുപത്രിയില് ചികിത്സയിലായിരുന്നു. കഴിഞ്ഞ ദിവസം ആരോഗ്യനില മോശമായതിനെതുടര്ന്ന് വെന്റിലേറ്ററിലേക്ക് മാറ്റുകയായിരുന്നു.
കുറിച്ചിത്താനം കാരാംകുന്നേൽ ഗോവിന്ദൻ നായരുടെയും ലക്ഷ്മിക്കുട്ടിയമ്മയുടെയും ഏകമകനാണ്. കുറിച്ചിത്താനം കെ.ആർ. നാരായണൻ ഗവൺമെന്റ് എൽപി സ്കൂളിൽ പ്രാഥമിക വിദ്യാഭ്യാസം പൂർത്തിയാക്കി. കുറിച്ചിത്താനം ശ്രീകൃഷ്ണ വൊക്കേഷണൽ ഹയർസെക്കൻഡറി സ്കൂളിലായിരുന്നു ഹൈസ്ക്കൂൾ പഠനം. ഉഴവൂർ സെന്റ് സ്റ്റീഫൻസ് കോളജിൽനിന്നും ധനതത്വശാസ്ത്രത്തിൽ ബിരുദമെടുത്തു. കെഎസ്യുവിലൂടെ രാഷ്ട്രീയത്തിലിറങ്ങിയ ഉഴവൂര് വിജയന് പാര്ട്ടി പിളര്ന്നപ്പോള് ആന്റണിക്കൊപ്പമായി.
കോണ്ഗ്ര്സ എസിലും എന്സിപിയിലും എത്തിയപ്പോഴാകട്ടെ ഇടതുപക്ഷത്ത് ഉറച്ചുനിന്നു. വികലാംഗ ക്ഷേമ കോർപറേഷൻ ചെയർമാൻ, സംസ്ഥാന മലിനീകരണ നിയന്ത്രണ ബോർഡ് അംഗം, എൻസിപി സംസ്ഥാന ജനറൽ സെക്രട്ടറി എന്നീ നിലകളിൽ പ്രവർത്തിച്ചു. കേരള കോൺഗ്രസ് (എം) ചെയർമാൻ കെ.എം.മാണിക്കെതിരെ 2001 ൽ പാലാ മണ്ഡലത്തിൽനിന്നു മൽസരിച്ചതാണ് നേരിട്ട ഏക നിയമസഭാ തിരഞ്ഞെടുപ്പ്. അത്തവണ പരാജയപ്പെട്ടു.എന്നാല് തെരഞ്ഞെടുപ്പ് കാലത്തും സമരമുഖങ്ങളിലും എല്ലാവര്ക്കും വേണ്ടപ്പെട്ടവനായി ഉഴവൂര് വിജയന്.
കോൺഗ്രസിന്റെ നയങ്ങളോടുള്ള എതിർപ്പിനെ തുടർന്ന് കോൺഗ്രസ് എസിലേക്കു മാറിയ വിജയൻ നിരവധി ട്രേഡ് യൂണിയനുകൾക്ക് നേതൃത്വം നൽകി.
എന്പിസി സംസ്ഥാന അധ്യക്ഷന് എന്നതിനപ്പുറം എല്ഡിഎഫിലെ ജനകീയ മുഖമുളള നേതാവ് എന്ന നിലയിലാകും കേരളം ഉഴവൂര് വിജയനെ ഓര്ക്കുക. നര്മ്മത്തില് ചാലിച്ച വാചക കസര്ത്തായിരുന്നു രാഷ്ട്രീയത്തിലെ അദ്ദേഹത്തിന്റെ ട്രേഡ്മാര്ക്ക്.വള്ളിച്ചിറ നെടിയാമറ്റത്തിൽ ചന്ദ്രമണിയമ്മയാണ് ഭാര്യ. വന്ദന, വർഷ എന്നിവർ മക്കളാണ്.
