പരിമിതമായ വസ്തുക്കൾ ഉപയോഗിച്ച് ജെസിബി നിർമ്മിച്ച് കൊച്ചുമിടുക്കൻ; അഭിനന്ദനവുമായി ബിഗ് ബി

ബോളിവുഡിലെ ബിഗ് ബി അമിതാഭ് ബച്ചനും കുട്ടിയെ അഭിനന്ദിച്ചുകൊണ്ട് വീഡിയോ ഷെയർ ചെയ്തിട്ടുണ്ട്.

Delhi, First Published May 29, 2019, 9:19 PM IST

കുട്ടികൾ പൊതുവേ കൈയ്യിൽ കിട്ടുന്ന എന്ത് സാധനവും തല്ലി പൊട്ടിക്കുകയാണ് പതിവ്. എന്നാൽ അവയിൽ നിന്നും വ്യത്യസ്ഥമായി തനിക്ക് ലഭിച്ച പരിമിതമായ വസ്തുക്കൾ ഉപയോഗിച്ച് ജെസിബി നിർമ്മിച്ച ഒരു കൊച്ചുമിടുക്കന്റെ വീഡിയോയാണ് ഇപ്പോൾ സമൂഹമാധ്യമങ്ങളിൽ കയ്യടി നേടിയിരിക്കുന്നത്.

ആറ്, ഏഴ് വയസ്സ് മാത്രം പ്രായം തോന്നിക്കുന്ന ഒരു ആൺകുട്ടിയാണ് പരിമിതമായ വസ്തുക്കൾ ഉപയോഗിച്ച് ജെസിബി നിർമ്മിച്ചിരിക്കുന്നത്. മരത്തിന്റെ കുഞ്ഞ് കഷണവും പ്ലാസ്റ്റിക്കും ഉപയോഗിച്ച് നിർമ്മിച്ച ജെസിബി കൊണ്ട് മണ്ണ് കോരാനാകും. തെരുവോരത്ത് നിന്നും ലഭിച്ച ഉപയോഗശൂന്യമായ സിറിഞ്ച് ഉപയോഗിച്ചാണ് ജെസിബിയുടെ കൈ നിർമ്മിച്ചിരിക്കുന്നത്.

കുഞ്ഞൻ ജെസിബി കൊണ്ട് മണ്ണ് മാന്തുന്ന വീഡിയോ പ്രചരിച്ചതിന് പിന്നാലെ നിരവധി പേരാണ് ഈ മിടുക്കനെ അഭിനന്ദിച്ചുകൊണ്ട് രംഗത്തെത്തിയിരിക്കുന്നത്. ബോളിവുഡിലെ ബിഗ് ബി അമിതാഭ് ബച്ചനും കുട്ടിയെ അഭിനന്ദിച്ചുകൊണ്ട് വീഡിയോ ഷെയർ ചെയ്തിട്ടുണ്ട്. ട്വിറ്ററിലൂടെയായിരുന്നു അദ്ദേഹത്തിന്റെ അഭിനന്ദനം. അമേയ്‌സിങ്.. ഇന്നോവേറ്റീവ് ഇന്ത്യ എന്നീ ക്യാപ്ഷനോടെ ആണ് അദ്ദേഹം വീഡിയോ ഷെയര്‍ ചെയ്തത്.