ആരെയും താരങ്ങളാക്കാൻ കഴിവുണ്ട് ഇന്നത്തെ സമൂഹമാധ്യമങ്ങൾക്ക്. അറിയപ്പെടാതിരുന്ന പല കലാകാരൻമാരും സമൂഹത്തിന്റെ മുഖ്യധാരയിലേക്ക് എത്തിപ്പെടാൻ സമൂഹമാധ്യമങ്ങൾ വളരെ വലിയ പങ്ക് വഹിച്ചിട്ടുണ്ട്. അത്തരമൊരു കുഞ്ഞുകലാകാരനും അവന്റെ കുഞ്ഞു ചെണ്ടയുമാണ് ഈ വീഡിയോയിലെ താരങ്ങൾ. ഏകദേശം രണ്ട് വയസ്സ് പ്രായം തോന്നിക്കുന്ന ഒരു കൊച്ചുമിടുക്കൻ വീട്ടിലെ വെറും തറയിലിരുന്ന് ചെണ്ട് കൊട്ടുകയാണ്. ഈ കൊട്ടിന്റെ പ്രത്യേകത എന്താണെന്ന് വച്ചാൽ അമ്മയുടെ നാടൻ പാട്ടിന്റെ താളത്തിനൊപ്പമാണിത്. പാട്ടിന്റെ ഭംഗിയ്ക്ക് അനുസരിച്ച് താളം ചോരാതെ അതിമനോഹരമായാണ് കുട്ടിത്താരത്തിന്റെ കൊട്ട്. പ്രായത്തെ പോലും വെല്ലുന്നതാണ് ഈ പ്രകടനമെന്ന് വീഡിയോ കണ്ടവർ ഒന്നടങ്കം പറയുന്നു. കൈതോല പായ വിരിച്ച് എന്ന് അമ്മ പാടുമ്പോൾ അതിന് അനുസരിച്ച് തല കുലുക്കി ആസ്വദിച്ച് കൊട്ടിപ്പാടുകയാണ് ഈ മിടുക്കനും അമ്മയുടെ പാട്ടും മകന്റെ കൊട്ടും അടിപൊളിയാണെന്നാണ് സോഷ്യൽ മീഡിയ ആസ്വാദകരുടെ വിലയിരുത്തൽ. 

"