ഹൈദരാബാദ്: സ്വന്തം സഹോദരി ദളിത് യുവാവിനെ വിവാഹം കഴിച്ചതിന് യുവതിയെ ഊരുവിലക്കി. തെലങ്കാനയിലെ നവാബ്പേട്ട് വില്ലേജിലാണ് കഴിഞ്ഞ ആറ് മാസമായി ജ്യോതി എന്ന യുവതി ഊരുവിലക്കും സാമൂഹിക ബഹിഷ്കരണവും നേരിടുന്നത്.
ഗൂണ്ട്ല സമുദായക്കാരിയായ ജ്യോതിയുടെ സഹോദരി ലത ദളിത് സമുദായമായ മഡിഗ ജാതിക്കാരനായ യുവാവിനെ വിവാഹം കഴിച്ചിരുന്നു. സാമുദായികമായ എതിര്പ്പുകള് മറികടന്നാണ് ലത വിവാഹം കഴിച്ചത്. ഭര്ത്താവുമായി പിരിഞ്ഞ ലത കഴിഞ്ഞ ആറ് മാസമായി ജ്യോതിക്കൊപ്പമാണ് താമസിച്ചു വരുന്നത്. ദളിത് സമുദായക്കാരനെ വിവാഹം കഴിച്ച സഹോദരിക്ക് അഭയം നല്കിയതിനെ തുടര്ന്നാണ് മറ്റ് സമുദായാംഗങ്ങള് ഊരുവിലക്ക് കല്പ്പിച്ചത്. സമുദായ നേതാക്കള്ക്കെതിരെ ജ്യോതി വ്യാഴാഴ്ച പോലീസില് പരാതി നല്കി. ഇതോടെയാണ് സംഭവം പുറത്തറിഞ്ഞത്.
