ഗള്ഫ് രാജ്യങ്ങളുള്പ്പെടെയുളള അന്താരാഷ്ട്ര വേദികളില് അഭിമാനത്തോടെ വിവരിക്കുന്ന ഇന്ത്യയുടെ മതേതര പാരമ്പര്യത്തിന് വിരുദ്ധമായ പൗരത്വ ഭേദഗതി നിയമം റദ്ദ് ചെയ്യണമെന്നും സംഗമം ആവശ്യപ്പെട്ടു
മനാമ: 'നാനാത്വത്തില് ഏകത്വ'മെന്ന ഇന്ത്യയുടെ മഹത്തായ പാരമ്പര്യത്തെയും സവിശേഷതയെയും തകര്ക്കാനുളള ശ്രമത്തെ ചെറുത്ത് തോല്പിക്കാന് പ്രവാസികള് ഒറ്റക്കെട്ടായി നില്ക്കണമെന്ന ആഹ്വാനവുമായി ബഹ്റൈനിലെ മലയാളി സംഘടനകൾ. മലയാളി സംഘടനകള് സംയുക്തമായി സംഘടിപ്പിച്ച സ്നേഹസംഗമത്തിലാണ് ആഹ്വാനം.
ഗള്ഫ് രാജ്യങ്ങളുള്പ്പെടെയുളള അന്താരാഷ്ട്ര വേദികളില് അഭിമാനത്തോടെ വിവരിക്കുന്ന ഇന്ത്യയുടെ മതേതര പാരമ്പര്യത്തിന് വിരുദ്ധമായ പൗരത്വ ഭേദഗതി നിയമം റദ്ദ് ചെയ്യണമെന്നും സംഗമം ആവശ്യപ്പെട്ടു. ബഹ്റൈന് കേരളീയ സമാജം, ഇന്ത്യന് ക്ലബ്, ഒഐസിസി, കെഎംസിസി, പ്രതിഭ, കെസിഎ, സമസ്ത ,ഐസിഎഫ്, ഫ്രന്റ്സ് അസോസിയേഷന് ,പ്രേരണ, ഭൂമിക, ഇന്ത്യന് ഇസ്ലാഹി സെന്റര്, ഐവൈസിസി, മാറ്റ്, ആപ്പ്, നവകേരള,സോഷ്യല് വെല്ഫെയര്, യൂത്ത് ഇന്ത്യ, അല് ഹിദായ, മലയാളി ബിസിനസ് ഫോറം, ഇന്ത്യന് സലഫി സെന്റര് തുടങ്ങിയ സംഘടനാ പ്രതിനിധികള് പങ്കെടുത്ത സംഗമത്തില് രാഷ്ട്രപതിക്ക് സമര്പ്പിക്കാനുള്ള നിവേദനത്തിന്റെ ഒപ്പു ശേഖരണവും നടന്നു.
ജനാധിപത്യപരമായി സമരത്തിനിറങ്ങിയവരെ അടിച്ചമര്ത്തുന്നതില് പതിഷേധിച്ച സംഗമം ജാതി-മത-ഭാഷാ ഭേദമന്യേ മുഴുവന് മനുഷ്യരും പ്രതിഷേധിക്കാനിറങ്ങണമെന്ന് ആവശ്യപ്പെട്ടു. ഇന്ത്യയിലെ ജനാധിപത്യവും മതേതരത്വവും സംരക്ഷിക്കാനുള്ള പോരാട്ടത്തില് തോളോട് തോള് ചേര്ന്ന് നില്ക്കുമെന്ന് പങ്കെടുത്തവര് പ്രതിജ്ഞ ചൊല്ലി. ഇന്ത്യയില് ജനിച്ചു വളര്ന്നവരെ മതം നോക്കി തരം തിരിച്ച് ഒഴിവാക്കാനുളള പദ്ധതിയുടെ ഭാഗമായ ദേശീയ പൗരത്വ രജിസ്റ്ററും നവീകരിച്ച ദേശീയ ജനസംഖ്യാ രജിസ്റ്ററും പിന്വലിക്കണമെന്നും പ്രമേയത്തിലൂടെ സംഗമം ആവശ്യപ്പെട്ടു.
