സൗദി അറേബ്യയിൽ ഇന്ന് 1213 പേര്‍ക്ക് കൂടി കൊവിഡ്; 1591 പേര്‍ രോഗമുക്തരായി
വിവിധ ആശുപത്രികളില്‍ ചികിത്സയിൽ കഴിയുന്നവരുടെ എണ്ണം 24,539 ആയി കുറഞ്ഞു. ഇതിൽ 1,675 പേരുടെ നില ഗുരുതരമാണ്. ഇവർ തീവ്രപരിചരണത്തിലാണ്. മറ്റുള്ളവരുടെ ആരോഗ്യനില തൃപ്തികരമാണ്.
റിയാദ്: സൗദി അറേബ്യയിൽ ഇന്ന് പുതുതായി 1213 കോവിഡ് കേസുകൾ റിപ്പോർട്ട് ചെയ്തു. 1591 പേർ സുഖം പ്രാപിക്കുകയും 32 പേർ മരിക്കുകയും ചെയ്തു. ഇതോടെ രാജ്യത്ത് ഇതുവരെ കോവിഡ് ബാധിച്ച് മരിച്ചവരുടെ എണ്ണം 3,580 ആയി. ഇതുവരെ റിപ്പോർട്ട് ചെയ്യപ്പെട്ട ആകെ രോഗബാധിതരുടെ എണ്ണം 3,05,186ഉം രോഗമുക്തരുടെ എണ്ണം 2,77,067ഉം ആയി. രാജ്യത്തെ രോഗമുക്തി നിരക്ക് 90.8 ശതമാനമാണിപ്പോള്‍.
വിവിധ ആശുപത്രികളില്‍ ചികിത്സയിൽ കഴിയുന്നവരുടെ എണ്ണം 24,539 ആയി കുറഞ്ഞു. ഇതിൽ 1,675 പേരുടെ നില ഗുരുതരമാണ്. ഇവർ തീവ്രപരിചരണത്തിലാണ്. മറ്റുള്ളവരുടെ ആരോഗ്യനില തൃപ്തികരമാണ്. വെള്ളിയാഴ്ച റിയാദ് 4, ജിദ്ദ 1, മക്ക 5, ഹുഫൂഫ് 4, മുബറസ് 1, ഖമീസ് മുശൈത്ത് 1, ഹാഇൽ 3, ഹഫർ അൽബാത്വിൻ 2, തബൂക്ക് 1, ജീസാൻ 1, അബൂഅരീഷ് 1, സബ്യ 2, അറാർ 5, സാംത 1 എന്നിവിടങ്ങളിലാണ് മരണം സംഭവിച്ചത്.
കഴിഞ്ഞ 24 മണിക്കൂറിനിടെ ഹാഇലിലും മക്കയിലുമാണ് പുതിയ കേസുകൾ ഏറ്റവും കൂടുതൽ റിപ്പോർട്ട് ചെയ്യപ്പെട്ടത്. രണ്ടിടത്തും 77 വീതം പുതിയ രോഗികളെ കണ്ടെത്തി. മദീനയിൽ 73ഉം ജീസാനിൽ 60ഉം തബൂക്കിൽ 52ഉം റിയാദിൽ 43ഉം ജിദ്ദയിൽ 39ഉം പുതിയ കേസുകൾ റിപ്പോർട്ട് ചെയ്തു. വെള്ളിയാഴ്ച രാജ്യത്ത് 62,413 കോവിഡ് ടെസ്റ്റുകൾ നടന്നു. ഇതുവരെ നടത്തിയ മൊത്തം ടെസ്റ്റുകളുടെ എണ്ണം 45,63,517 ആയി.
