Asianet News MalayalamAsianet News Malayalam

അന്ന് കോലിയോട് വിവാഹാഭ്യര്‍ഥന നടത്തി; ഇന്ന് കോലിയെന്ന പേരുപോലും തെറ്റാതെ എഴുതാനറിയാത്ത ഇംഗ്ലീഷ് താരം

England Woman Cricketer Gets Virat Kohli Spelling Wrong Twitter Takes Her To Task
Author
First Published Sep 12, 2017, 9:23 AM IST

ലണ്ടന്‍: ഇംഗ്ലീഷ് വനിതാ ക്രിക്കറ്റര്‍ ഡാനിയേല വ്യാറ്റിനെ ഇന്ത്യക്കാര്‍ മറന്നിട്ടുണ്ടാവില്ല. വനിതാ ലോകകപ്പില്‍ മിതാലിപ്പടയെ തോല്‍പ്പിച്ച് കിരീടം നേടിയ ഇംഗ്ലീഷ് സംഘാംഗമായിരുന്നു ഡാനിയേല. മറ്റൊരു തരത്തിലും ഡാനിയേലയെ ഇന്ത്യക്കാര്‍ അറിയും. ഇന്ത്യന്‍ നായകന്‍ വിരാട് കോലിയോട് പ്രണയാഭ്യര്‍ഥന നടത്തിയ ഇംഗ്ലീഷ് താരമെന്ന നിലയില്‍. 2014ലെ ട്വന്റി-20 ലോകകപ്പിനിടെയായിരുന്നു ഇത്.

അന്ന് കോലി സമ്മാനമായി നല്‍കിയൊരു ബാറ്റ് ഡാനിയേല ഇപ്പോഴും നിധിപോലെ സൂക്ഷിക്കുന്നുണ്ട്. എന്നാല്‍ കഴിഞ്ഞ ദിവസം അവരത് പുറത്തെടുത്തു. കോലി തന്ന ബാറ്റ് വെച്ച് പരിശീലനം നടത്താനൊരുങ്ങുന്ന കാര്യം ട്വിറ്ററിലൂടെ ആരാധകരെ അറിയിക്കുകയും ചെയ്തു.

പക്ഷേ, അത് ചെയ്തപ്പോള്‍ ചെറിയൊരു കൈയബദ്ധം പറ്റി. കോലി നല്‍കിയ ബാറ്റിന്റെ കീഴ് ഭാഗത്ത് കോലിയുടെ പേരെഴുതിയ ചിത്രത്തോടൊപ്പമായിരുന്നു ഡാനിയേലയുടെ ട്വീറ്റ്. എന്നാല്‍ വിരാട് കോലി എന്ന പേരെഴുതിയപ്പോള്‍ ഒരക്ഷരം മാറിപ്പോയി. കൊഹ്‌ലി എന്നതിന് പകരം എഴുതിയപ്പോള്‍ കോളി എന്നായി. ഇതോടെ, കോലി ആരാധകര്‍ ട്വിറ്ററില്‍ ഡാനിയേലയെ ട്രോളാനും തുടങ്ങി.

2014ലെ ട്വന്റി-20 ലോകകപ്പ് സെമിയില്‍ 72 റണ്‍സടിച്ച കോലിയുടെ മികവില്‍ ദക്ഷിണാഫ്രിക്കയെ തോല്‍പ്പിച്ച് ഇന്ത്യ ഫൈനലിലെത്തിയപ്പോഴായിരുന്നു ഡാനിയേല ട്വിറ്ററിലൂടെ കോലിയോട് വിവാഹ അഭ്യര്‍ഥന നടത്തിയത്. 26കാരിയായ ഡാനിയേല 2010ല്‍ ഇന്ത്യക്കെതിരെ ആണ് അരങ്ങേറിയത്. 53 ഏകദിനങ്ങളില്‍ 17.20 ശരാശരിയില്‍ 602 റണ്‍സാണ് ഡാനിയേലയുടെ സമ്പാദ്യം. 27 വിക്കറ്റുകളും സ്വന്തം പേരിലുണ്ട്.

Follow Us:
Download App:
  • android
  • ios