പൂനെ: എംഎസ് ധോണി ഐപിഎല്ലില് റൈസിംഗ് പൂനെ സൂപ്പര് ജയന്റ്സിന്റെ ക്യാപ്റ്റന് സ്ഥാനമൊഴിഞ്ഞു. ഓസ്ട്രേലിയന് നായകന് കൂടിയായ സ്റ്റീവന് സ്മിത്താണ് പൂനെയുടെ പുതിയ നായകന്. ഇന്ത്യയുടെ ഏകദിന-ടി20 ക്യാപ്റ്റന് സ്ഥാനവും ധോണി നേരത്തെ രാജിവെച്ചിരുന്നു. കൂടുതല് സ്വാതന്ത്ര്യത്തോടെ കളിക്കാനായാണ് ധോണി പൂനെ ക്യാപ്റ്റന് സ്ഥാനവും രാജിവെച്ചതെന്നാണ് സൂചന. അതേസമയം, ക്യാപ്റ്റന് സ്ഥാനത്തുനിന്ന് ധോണിയെ നീക്കിയതാണെന്ന തരത്തിലുള്ള റിപ്പോര്ട്ടുകള് ടീം അധികൃതര് തള്ളിക്കളഞ്ഞിട്ടുണ്ട്.
ഒത്തുകളി ആരോപണത്തെത്തുടര്ന്ന് രണ്ട് വര്ഷ വിലക്ക് നേരിട്ട ചെന്നൈ സൂപ്പര് കിംഗ്സിന്റെ നായകനായിരുന്നു ധോണി. ചെന്നൈയ്ക്ക് പകരം രണ്ടുവര്ഷത്തേക്കായി ഐപിഎല്ലില് എത്തിയ ടീമാണ് പൂനെ സൂപ്പര് ജയന്റ്സ്. കഴിഞ്ഞ ഐപിഎല് സീസണില് ധോണിക്ക് കീഴില് പൂനെയ്ക്ക് തിളങ്ങാനായിരുന്നില്ല. കളിച്ച 14 മത്സരങ്ങളില് അഞ്ചെണ്ണത്തില് മാത്രമാണ് പൂനെ ജയിച്ചത്.
ഇന്ത്യന് ഏകദിന-ടി20 നായക സ്ഥാനമൊഴിയുമ്പോള് ഐപിഎല്ലിലും ജാര്ഖണ്ഡിനായി കളിക്കുമ്പോഴും നായകനായി തുടരുമെന്ന് ധോണി വ്യക്തമാക്കിയിരുന്നു. എന്നാല് ഐപിഎല് പത്താം എഡിഷന് തുടങ്ങാന് ഒരു മാസം മാത്രം ബാക്കിയിരിക്കെയാണ് പൂനെയുടെ ക്യാപ്റ്റന് സ്ഥാനവും ധോണി അപ്രതീക്ഷിതമായി രാജിവെച്ചത്.
