സാന്റിയാഗോ ബെര്ണാബ്യൂ: യുവേഫ ചാമ്പ്യൻസ് ലീഗിൽ ഇന്ന് സൂപ്പർ പോരാട്ടം. ഫ്രഞ്ച് വമ്പന്മാരായ പി എസ് ജി നിലവിലെ ചാമ്പ്യൻമാരായ റയൽ മാഡ്രിഡുമായി ഏറ്റുമുട്ടും. സൂപ്പര് താരങ്ങളായ ക്രിസ്റ്റ്യാനോ റൊണാള്ഡോയും നെയ്മറും നേര്ക്കുനേര് വരുന്നതാണ് മത്സരത്തിന്റെ പ്രധാന സവിശേഷത. റയലിന്റെ തട്ടകത്തില് ഇന്ത്യൻ സമയം പുലർച്ചെ ഒന്നേകാലിനാണ് കളി തുടങ്ങുക.
ചാമ്പ്യന്സ് ലീഗില് മികച്ച ഫോമിലുള്ള റൊണാള്ഡോ സീസണില് ആറ് മത്സരങ്ങളില് നിന്ന് ഒമ്പത് ഗോളുകള് ഇതിനകം നേടിയിട്ടുണ്ട്. അതേസമയം പിഎസ്ജിയിലെത്തിയ ശേഷം ആകെ 27 മത്സരങ്ങളില് 26 ഗോളും 16 അസിസ്റ്റും നെയ്മറുടെ പേരിലുണ്ട്. മുമ്പ് അഞ്ച് തവണ ഇരുവരും ഏറ്റുമുട്ടിയപ്പോള് മൂന്ന് വിജയം റയലും ഒരു വിജയം പിഎസ്ജിയും നേടി.
എന്നാല് അവസാനം ഇരുവരും ഏറ്റുമുട്ടിയ 2016 ചാമ്പ്യന്സ് കപ്പില് വിജയം പിഎസ്ജിക്കൊപ്പമായിരുന്നു(3-1). നെയ്മര് ടീമിലെത്തിയ ശേഷം പിഎസ്ജി ആദ്യമായാണ് റയല് മാഡ്രിഡിനെതിരെ കളിക്കാനിറങ്ങുന്നത്.
