Asianet News MalayalamAsianet News Malayalam

ലോകത്തിലെ ഏറ്റവും പഴക്കം ചെന്ന വൈൻ, ഒന്നും രണ്ടുമല്ല 2000 വർഷം പഴക്കം

2000 വർഷമാണ് വൈനിന്റെ പഴക്കം. ഇന്ന് കിട്ടുന്ന ചില സ്പാനിഷ് വൈനുകളോട് ഈ വൈനിന് സാമ്യമുണ്ട്. കിട്ടുമ്പോൾ കുടിക്കാവുന്ന അവസ്ഥയിൽ തന്നെയാണ് വൈൻ ഉണ്ടായിരുന്നത്.

2000 year old worlds oldest wine
Author
First Published Jun 21, 2024, 2:44 PM IST

പഴക്കം ചെല്ലുന്തോറും വീര്യം കൂടുന്ന ഒന്നാണ് വൈൻ. അത് അറിയാത്തതായി ആരുമില്ല. എന്നാലും, ഏറെക്കുറെ എത്ര പഴക്കം? 2000 വർഷം പഴക്കമുള്ള വൈനാണെങ്കിലോ? ശിലായു​ഗകാലം തന്നെ ഭൂമിയിൽ വൈനുണ്ട് എന്നും 8000 വർഷങ്ങൾക്ക് മുമ്പെങ്കിലും വൈൻ ഉണ്ടാക്കിത്തുടങ്ങിക്കാണുമെന്നാണ് ​ഗവേഷകർ പറയുന്നത്. എന്നാൽ, നമുക്ക് കിട്ടിയിട്ടുള്ള ഏറ്റവും പഴക്കം ചെന്ന വൈൻ 2000 വർഷം പഴക്കമുള്ളതാണ്. 

2019 -ൽ ഒരു സ്പാനിഷ് കുടുംബമാണ് ഈ അപൂർവമായ വൈൻ കണ്ടെത്തിയത്. കാർമോണയിലെ അവരുടെ വീട് പുതുക്കിപ്പണിയുന്നതിനിടെയാണ് 2,000 വർഷം പഴക്കമുള്ള റോമൻ ശവകുടീരത്തിനുള്ളിൽ വൈൻ കണ്ടെത്തിയത്. റോമൻ ദൈവമായ ജാനസിനെ പ്രതിനിധീകരിക്കുന്ന വിവിധ വസ്തുക്കൾക്കൊപ്പമാണ് ഈ വൈനും ഉണ്ടായിരുന്നത് എന്നും റിപ്പോർട്ടുകൾ പറയുന്നു. 

ശവകുടീരത്തിനുള്ളിൽ ആകെ എട്ട് അറകൾ ഉണ്ടായിരുന്നു, അവയിൽ രണ്ടെണ്ണം ശൂന്യമായിരുന്നു. ആറെണ്ണത്തിൽ ചുവന്ന ദ്രാവകം നിറച്ച ഒരു പാത്രം അടങ്ങിയിരുന്നു. പിന്നീട് ​ഗവേഷകർ നടത്തിയ വിശദമായ പരിശോധനയിലാണ് അത് വൈനാണ് എന്ന് തിരിച്ചറിഞ്ഞത്. 

2000 വർഷമാണ് വൈനിന്റെ പഴക്കം. ഇന്ന് കിട്ടുന്ന ചില സ്പാനിഷ് വൈനുകളോട് ഈ വൈനിന് സാമ്യമുണ്ട്. കിട്ടുമ്പോൾ കുടിക്കാവുന്ന അവസ്ഥയിൽ തന്നെയാണ് വൈൻ ഉണ്ടായിരുന്നത്. മരണാനന്തരചടങ്ങുകളുടെ ഭാ​ഗമായി വൈൻ ഉപയോ​ഗിച്ചിരുന്നിരിക്കാം, അതിനാലാവണം അത് ശവകുടീരത്തിൽ വന്നത് എന്നും ​ഗവേഷകർ പറയുന്നു. 

വെള്ളനിറമാണ് വൈനിന് ഉണ്ടായിരുന്നത്. മറ്റേതെങ്കിലും നിറമായിരുന്നിരിക്കാം ഉണ്ടായിരുന്നത്, കാലക്രമേണ വെള്ളനിറമായി മാറിയതാവാം എന്നും ​ഗവേഷകർ പറയുന്നു. ഒപ്പം രുചി അറിയുന്നതിനുള്ള ഒരു ടെസ്റ്റും നടത്തിയിരുന്നു. വൈനിന് ഉപ്പുരുചിയാണ് എന്നാണ് അതിൽ നിന്നും കണ്ടെത്തിയത്. 

ഏഷ്യാനെറ്റ് ന്യൂസ് ലൈവ് കാണാം: 

ഏഷ്യാനെറ്റ് ന്യൂസ് വാർത്തകൾ തത്സമയം കാണാം

Latest Videos
Follow Us:
Download App:
  • android
  • ios