ഉത്തം കശ്യപ് എന്ന ഒരു ട്വിറ്റർ ഉപയോക്താവാണ് തൻറെ അക്കൗണ്ടിലൂടെ ഈ ഓട്ടോറിക്ഷ ഡ്രൈവറെ ലോകത്തിന് പരിചയപ്പെടുത്തിയത്.
തൻറെ യാത്രക്കാരെ സന്തോഷിപ്പിക്കാൻ ബാംഗ്ലൂർ നഗരത്തിലെ ഒരു ഓട്ടോറിക്ഷാ ഡ്രൈവർ തന്റെ വണ്ടിയിൽ ചെയ്തു വച്ചിരിക്കുന്ന കാര്യങ്ങൾ കണ്ടാൽ നിങ്ങൾ ഞെട്ടും. ബാക്ടീരിയകളിൽ നിന്നും രക്ഷപ്പെടാൻ സാനിറ്റൈസർ, യാത്രക്കിടയിൽ ദാഹിച്ചാൽ കുടിക്കാൻ വെള്ളം, വിശന്നാൽ കഴിക്കാൻ ബിസ്ക്കറ്റ്, ഇനി ഒരു ഒരു ചോക്ലേറ്റോ മിഠായിയോ ആണ് തിന്നണമെന്ന് തോന്നുന്നതെങ്കിൽ അതും റെഡി. തീർന്നില്ല യാത്രക്കിടയിൽ എന്തെങ്കിലും ചെറിയ അസുഖങ്ങൾ വരികയോ പരിക്ക് പറ്റുകയോ ചെയ്താൽ ഉപയോഗിക്കാൻ ഫസ്റ്റ് എയ്ഡ് ബോക്സ്, ബോറടിച്ചാൽ വായിക്കാൻ പുസ്തകങ്ങൾ ഇങ്ങനെ ഒരു യാത്രക്കിടയിൽ യാത്രക്കാരന് ആവശ്യമായതെല്ലാം ഒരുക്കി തൻറെ യാത്രക്കാരെ സന്തോഷിപ്പിക്കുകയാണ് ഈ ഡ്രൈവർ.
ബാംഗ്ലൂർ നഗരത്തിൽ ഓട്ടോറിക്ഷ ഓടിക്കുന്ന രാജേഷ് എന്ന ഓട്ടോ ഡ്രൈവർ ആണ് ഈ വേറിട്ട ചിന്താഗതിയുടെ ഉടമ. വളരെ ചെറിയ ദൂരം മാത്രം യാത്ര ചെയ്യുന്ന ഒരു ഓട്ടോറിക്ഷയിൽ എന്തിനാണ് ഇത്രയും അധികം സൗകര്യങ്ങൾ എന്ന് ചിലപ്പോൾ നിങ്ങൾക്ക് തോന്നിയേക്കാം. അതിനെല്ലാം രാജേഷിന് ഒറ്റ ഉത്തരമേയുള്ളൂ 'യാത്രക്കാരാണ് എനിക്കെല്ലാം..' തൻറെ ജീവിതം മുന്നോട്ടു കൊണ്ടുപോകുന്നതിൽ ഓരോ യാത്രക്കാരനും വലിയ പങ്ക് ഉണ്ടെന്നാണ് രാജേഷ് പറയുന്നത്. അതുകൊണ്ടുതന്നെ തന്റെ വാഹനത്തിൽ യാത്ര ചെയ്യുമ്പോൾ അവർക്ക് യാതൊരു കുറവുകളും ഇല്ലാതെ കൊണ്ടുപോകേണ്ടത് തൻറെ ഉത്തരവാദിത്തമാണെന്നും ഇയാൾ പറയുന്നു.
ഉത്തം കശ്യപ് എന്ന ഒരു ട്വിറ്റർ ഉപയോക്താവാണ് തൻറെ അക്കൗണ്ടിലൂടെ ഈ ഓട്ടോറിക്ഷ ഡ്രൈവറെ ലോകത്തിന് പരിചയപ്പെടുത്തിയത്. ബാംഗ്ലൂർ നഗരത്തിൽ ഓട്ടോറിക്ഷ ഓടിക്കുന്ന രാജേഷിനെ പരിചയപ്പെടു. തൻറെ യാത്രക്കാർക്ക് ആവശ്യമായതെല്ലാം അദ്ദേഹം ഓട്ടോറിക്ഷയിൽ സൂക്ഷിക്കുന്നു. യാത്രക്കാരാണ് തനിക്ക് എല്ലാം എന്നാണ് ഇദ്ദേഹം പറയുന്നത്. രാജേഷിന് എൻറെ സല്യൂട്ട്. എൻറെ ഈ യാത്രയെ അദ്ദേഹത്തിൻറെ ഈ സ്നേഹം നിറഞ്ഞ പ്രവൃത്തി വേറിട്ടതാക്കി മാറ്റി എന്നാണ് ഓട്ടോറിക്ഷ ഡ്രൈവറായ രാജേഷിന്റെ ചിത്രം പോസ്റ്റ് ചെയ്തു കൊണ്ട് ഉത്തം സോഷ്യൽ മീഡിയയിൽ കുറിച്ചത്.
നിമിഷനേരം കൊണ്ട് തന്നെ അദ്ദേഹത്തിൻറെ പോസ്റ്റ് വൈറലായി. ഇപ്പോൾ നിരവധി ആളുകളാണ് ഈ ഓട്ടോറിക്ഷ ഡ്രൈവറെ അഭിനന്ദിച്ചുകൊണ്ട് സോഷ്യൽ മീഡിയയിൽ തങ്ങളുടെ അഭിപ്രായങ്ങൾ രേഖപ്പെടുത്തുന്നത്. ഇദ്ദേഹത്തെ പോലെയുള്ള ആളുകളാണ് ഇന്നത്തെ സമൂഹത്തിന് ആവശ്യമെന്നും എത്രമാത്രം അഭിനന്ദിച്ചാലും മതിയാകില്ല എന്നിങ്ങനെ രാജേഷിനോടുള്ള സ്നേഹം വാക്കുകളിലൂടെ പ്രകടിപ്പിക്കുകയാണ് സോഷ്യൽ മീഡിയ.
