കരിമ്പിന്റെ ഇല മേഞ്ഞ കുടിലിൽ നിന്നും ജില്ലാ കളക്ടറിലേക്ക്, ഈ ജീവിതം നമുക്കൊരു പാഠമാണ്...
മെഡിസിൻ അവസാന വർഷത്തിൽ, എംബിബിഎസ് പരീക്ഷയ്‌ക്കൊപ്പം, അദ്ദേഹം തന്റെ യുപിഎസ്‌സി പരീക്ഷയും എഴുതി, ആദ്യ ശ്രമത്തിൽ തന്നെ വിജയിച്ചു.
"ജനനം മുതൽ നമുക്കറിയാവുന്നതാണ് ദാരിദ്ര്യം. ഗ്രാമത്തിലെ ഓരോ വ്യക്തിയിലും അത് വളരെ ആഴത്തിൽ പതിഞ്ഞിരിക്കുന്നു. അവർ ദരിദ്രരോ നിരക്ഷരരോ ആണെന്നത് ആരും തിരിച്ചറിയുന്നില്ല. ഓരോ വ്യക്തിയും ഉള്ളതിൽ തൃപ്തിപ്പെട്ട്, പ്രകൃതി വിഭവങ്ങളുപയോഗിച്ച് ജീവിക്കേണ്ടി വരുന്നു" എംബിബിഎസ് പഠിച്ച സക്രി താലൂക്കിലെ സമോഡെ ഗ്രാമത്തിൽ നിന്നുള്ള ഡോ. രാജേന്ദ്ര ഭാരുദിന്റെ വാക്കുകളാണിത്. തന്റെ അമ്മയെ അത്ഭുതപ്പെടുത്തിക്കൊണ്ടാണ് അദ്ദേഹം ഐഎഎസായി ഗ്രാമത്തിലേക്ക് മടങ്ങിയത്.
ഡോ. രാജേന്ദ്ര ഭരുദിന്റെ ജീവിതം ആര്‍ക്കും പ്രചോദനമാണ്. സാക്രി താലൂക്കയിലെ സമോഡെയിലെ ഒരു ചെറിയ ഗ്രാമത്തിൽ 1988 ജനുവരി 7 -നാണ് ഡോ. രാജേന്ദ്ര ഭരൂദ് ജനിച്ചത്. അദ്ദേഹത്തെ അമ്മ ഗര്‍ഭിണി ആയിരിക്കുമ്പോള്‍ തന്നെ അച്ഛൻ മരിച്ചു. രാജേന്ദ്ര ഭരൂദിന്റെ കുടുംബം വളരെ ദരിദ്രമായിരുന്നു. പിതാവിന്റെ ഒരു ഫോട്ടോ പോലും എടുക്കാനവര്‍ക്ക് പണമുണ്ടായിരുന്നില്ല. മദ്യം വിറ്റാണ് ഭരുദിന്റെ അമ്മ ഉപജീവനമാർഗം കണ്ടെത്തിയത്. കുടുംബം മുഴുവൻ താമസിച്ചത് കരിമ്പിന്റെ ഇലകൊണ്ട് നിർമ്മിച്ച ഒരു ചെറിയ കുടിലിലാണ്.
ഒരു പത്രത്തോട് രാജേന്ദ്ര ഭരൂദ് പറഞ്ഞതിങ്ങനെ, 'എനിക്ക് മൂന്ന് വയസായിരുന്നു. വിശക്കുമ്പോൾ ഞാൻ കരയുമായിരുന്നു. എന്റെ കരച്ചിൽ മദ്യപാനികൾക്ക് ബുദ്ധിമുട്ടുണ്ടാക്കും. എന്നെ നിശബ്ദരാക്കാൻ ചിലർ എന്റെ വായിൽ മദ്യത്തുള്ളികൾ ഒഴിക്കും. വിശപ്പ് ഒരു പരിധിവരെ ഇല്ലാതാകാനും ഞാൻ നിശബ്ദനായിരിക്കാനും മുത്തശ്ശി എനിക്ക് പാലിന് പകരം കുറച്ച് മദ്യം തരും.' കുറച്ച് ദിവസങ്ങൾക്ക് ശേഷം, മദ്യം അദ്ദേഹത്തിന് ശീലമായി. ജലദോഷത്തിന് പോലും മരുന്നിനു പകരം മദ്യമാണ് കഴിച്ചിരുന്നത് എന്നും അദ്ദേഹം പറഞ്ഞു.
വീടിന് പുറത്ത് പ്ലാറ്റ്‌ഫോമിൽ ഇരുന്നാണ് താൻ പഠിച്ചിരുന്നത്. മദ്യം കഴിക്കാൻ വന്ന ആളുകൾ അടുത്തുള്ള കടയിൽ നിന്ന് ലഘുഭക്ഷണം കൊണ്ടുവരാൻ പറയുമ്പോള്‍ അവന് കുറച്ച് അധിക പണം നൽകി. അതേ പണം കൊണ്ട് അദ്ദേഹം ചില പുസ്തകങ്ങൾ വാങ്ങി. കഠിനമായി പഠിക്കുകയും പത്താം ക്ലാസ് പരീക്ഷയിലും പന്ത്രണ്ടാം ക്ലാസ് പരീക്ഷയിലും 95 ശതമാനം മാർക്ക് നേടുകയും ചെയ്തു. 2006 -ൽ മെഡിക്കൽ പ്രവേശന പരീക്ഷയെഴുതി. ഡോ. കെഇഎം ആശുപത്രിയിലും സേത്ത് ജിഎസ് മെഡിക്കൽ കോളേജിലും 'മികച്ച വിദ്യാർത്ഥി അവാർഡ്' നേടി രാജേന്ദ്ര ഭരൂദ് സ്വയം തെളിയിച്ചു.
രാജേന്ദ്ര ഭരൂദ് എംബിബിഎസ് അവസാന വർഷം പഠിക്കുമ്പോള്‍ യുപിഎസ്‌സി പരീക്ഷ എഴുതാൻ തീരുമാനിച്ചു. അതൊരു എളുപ്പമുള്ള കാര്യമായിരുന്നില്ല, ഇന്റേൺഷിപ്പ് നടക്കുമ്പോഴും ഭരൂദ് രണ്ട് പരീക്ഷകൾക്ക് പഠിക്കുകയായിരുന്നു. മെഡിസിൻ അവസാന വർഷത്തിൽ, എംബിബിഎസ് പരീക്ഷയ്‌ക്കൊപ്പം, അദ്ദേഹം തന്റെ യുപിഎസ്‌സി പരീക്ഷയും എഴുതി, ആദ്യ ശ്രമത്തിൽ തന്നെ വിജയിച്ചു. യുപിഎസ്‌സി ഫലങ്ങൾ പ്രഖ്യാപിച്ചപ്പോൾ ഡോ. രാജേന്ദ്ര ഭരൂദ് തന്റെ ഗ്രാമത്തിൽ തിരിച്ചെത്തി, മകൻ ഇപ്പോൾ സിവിൽ ഓഫീസറാണെന്ന കാര്യം അമ്മയ്ക്ക് അറിയില്ലായിരുന്നു.
രാജേന്ദ്രൻ വിശദീകരിക്കുന്നു, "കുട്ടിക്കാലം മുതൽ ഞാൻ ഒരു ഡോക്ടറാകണമെന്ന് സ്വപ്നം കണ്ടിരുന്നു, അങ്ങനെ എനിക്ക് മറ്റുള്ളവരെ സഹായിക്കാനാകും. പക്ഷേ, ഞാൻ വളർന്നപ്പോൾ, ആളുകളെ സഹായിക്കാൻ, അവരെ പഠിപ്പിക്കുകയും മെച്ചപ്പെട്ട ജീവിതത്തിനുള്ള അവസരങ്ങൾ നൽകുകയും ചെയ്യണമെന്ന് ഞാൻ മനസ്സിലാക്കി. ഇത് ചെയ്യുന്നതിന് ഞാൻ ഒരു സിവിൽ സർവീസുദ്യോഗസ്ഥനാകണമെന്ന് മനസിലായി. ”എന്നിരുന്നാലും, ആദ്യശ്രമത്തിൽ റാങ്കിന്റെ അടിസ്ഥാനത്തിൽ ഐആർഎസ് സേവനത്തിന് അദ്ദേഹത്തെ തെരഞ്ഞെടുത്തു. പക്ഷേ, അദ്ദേഹം ഒരിക്കൽക്കൂടി ശ്രമിച്ചു, 2013 പരീക്ഷയിൽ, ഒരു ഐഎഎസ് ആകുന്നതിലൂടെ അദ്ദേഹം തന്റെ ലക്ഷ്യം നേടി.
രാജേന്ദ്ര ഭാരൂദ് അടുത്ത കുറച്ച് വർഷങ്ങളിൽ മസൂറിയിൽ പരിശീലനം നേടി, തുടർന്ന് 2015 -ൽ നന്ദേഡ് ജില്ലയിൽ അസിസ്റ്റന്റ് കളക്ടറായും പ്രൊജക്ട് ഓഫീസറായും നിയമിതനായി. 2017 -ൽ സോളാപൂരിന്റെ ചീഫ് എക്സിക്യൂട്ടീവ് ഓഫീസറായി അദ്ദേഹം നിയമിതനായി. ഒടുവിൽ, 2018 ജൂലൈയിൽ അദ്ദേഹത്തെ നന്ദൂർബാറിന്റെ കളക്ടറാക്കി. കൗണ്ടിയുടെ രണ്ടാമത്തെ കൊവിഡ് -19 തരംഗത്തിൽ, തന്റെ പരിധിയില്‍ നേരത്തെ കാര്യങ്ങള്‍ സജ്ജമാക്കിയും ഓക്സിജന് ക്ഷാമമില്ലാതാക്കിയും അദ്ദേഹം പ്രശംസയേറ്റ് വാങ്ങി.
ഡോ. രാജേന്ദ്ര ഭരൂദ് 'മീ ഏക് സ്വപൻ പഹിൽ' (2014) എന്ന മറാത്തി പുസ്തകവും എഴുതിയിട്ടുണ്ട്.
