സൈന്യത്തിന്റെ പെരുമാറ്റച്ചട്ടവും സോഷ്യൽ മീഡിയാ നയവും പട്ടാളക്കാരി ലംഘിച്ചുവെന്ന് സൈനിക വക്താവ് ജനറൽ ക്ലെമന്റ് നവാചുക്വു ബിബിസിയോട് പറഞ്ഞു.
ഡ്യൂട്ടിക്കിടെ വിവാഹാഭ്യര്ത്ഥന സ്വീകരിച്ചു, നൈജീരിയയില് പട്ടാളക്കാരി(Nigerian soldier)യെ അറസ്റ്റ് ചെയ്തു. യൂണിഫോമിലായിരിക്കെ പ്രണയത്തില് മുഴുകി, പട്ടാളത്തിലെ പെരുമാറ്റച്ചട്ടം ലംഘിച്ചു എന്നതുമാണ് അവര്ക്കെതിരെയുള്ള കുറ്റമെന്ന് സേനാവക്താവ് പറയുന്നു. മുട്ടുകുത്തി ഒരാള് വിവാഹാഭ്യര്ത്ഥന നടത്തവെ പട്ടാളക്കാരി അത് സ്വീകരിക്കുകയും ചുറ്റുമുള്ളവര് സന്തോഷം പ്രകടിപ്പിക്കുന്നതുമായ ഒരു വീഡിയോ പുറത്ത് വന്നിരുന്നു.
എന്നാല്, അറസ്റ്റിനെതിരെ വനിതാവകാശ പ്രവര്ത്തകര് പ്രതികരിച്ചു. ഇത് വിവേചനമാണ് എന്നാണ് അവര് പറഞ്ഞത്. പുരുഷ സൈനികര് യൂണിഫോമിലായിരിക്കെ പരസ്യമായി പ്രണയബന്ധങ്ങള് പ്രദര്ശിപ്പിക്കാറുണ്ടെങ്കിലും അവര്ക്കെതിരെ നടപടിയൊന്നും കൈക്കൊള്ളാറില്ല എന്നും വിമന് എംപവര്മെന്റ് ആന്ഡ് ലീഗല് എയ്ഡ് ഗ്രൂപ്പ് പറയുന്നു. മനുഷ്യാവകാശ പ്രവർത്തകനും മുൻ നൈജീരിയൻ പ്രസിഡന്റ് സ്ഥാനാർത്ഥിയുമായ ഒമോയേൽ സോവോർ സൈന്യത്തിന്റെ തീരുമാനത്തെ സ്ത്രീവിരുദ്ധതയാണെന്ന് അപലപിച്ചു.
നാഷണൽ യൂത്ത് സർവീസ് കോർപ്സ് (എൻവൈഎസ്സി) എന്നറിയപ്പെടുന്ന ഗവൺമെന്റിന്റെ യുവ പരിശീലന പദ്ധതിയിലെ ട്രെയിനിയിൽ നിന്നാണ് പട്ടാളക്കാരി വിവാഹാഭ്യർത്ഥന സ്വീകരിച്ചത്. ഒരു വർഷം നീണ്ടുനിൽക്കുന്ന നിർബന്ധിത പദ്ധതിയുടെ ഭാഗമായി സർവ്വകലാശാലകളിൽ നിന്നും മറ്റ് ഉന്നത വിദ്യാഭ്യാസ സ്ഥാപനങ്ങളിൽ നിന്നുമുള്ള ബിരുദധാരികൾക്ക് സൈന്യത്തിൽ നിന്ന് നിർദ്ദേശങ്ങൾ ലഭിക്കും. പടിഞ്ഞാറൻ ക്വാറ സംസ്ഥാനത്ത് പരിശീലന പരിപാടിക്കിടെയാണ് വിവാഹാഭ്യാര്ത്ഥന നടത്തിയത്. എപ്പോഴാണ് സംഭവം നടന്നത് എന്ന് വ്യക്തമല്ലെങ്കിലും കഴിഞ്ഞയാഴ്ചയാണ് വീഡിയോ പ്രചരിച്ചത്. നിരവധി സോഷ്യൽ മീഡിയാ ഉപയോക്താക്കൾ ദമ്പതികള്ക്ക് ആശംസകളറിയിക്കുകയും വിവാഹാഭ്യർത്ഥന നടത്തിയതിന് പുരുഷനെ അഭിനന്ദിക്കുകയും ചെയ്തു. മറ്റുള്ളവർ പട്ടാളക്കാരിയെ കളിയാക്കി.
സൈന്യത്തിന്റെ പെരുമാറ്റച്ചട്ടവും സോഷ്യൽ മീഡിയാ നയവും പട്ടാളക്കാരി ലംഘിച്ചുവെന്ന് സൈനിക വക്താവ് ജനറൽ ക്ലെമന്റ് നവാചുക്വു ബിബിസിയോട് പറഞ്ഞു. അവളുടെ പെരുമാറ്റം അച്ചടക്കത്തിന് എതിരായിരുന്നു എന്നും പരിശീലകരുടെ ചുമതല യൂത്ത് കോർപ്സ് അംഗങ്ങളെ പരിശീലിപ്പിക്കുക എന്നതായിരുന്നു, അവരിൽ ആരുമായും പ്രണയബന്ധത്തിൽ ഏർപ്പെടരുത് എന്നും ജനറൽ നവാചുക്വു കൂട്ടിച്ചേർത്തു. NYSC സംഭവത്തില് പ്രതികരിച്ചിട്ടില്ല.
