സുക്കർബർഗിന്‍റെ സുരക്ഷ; ഫേസ്ബുക്ക് മുടക്കുന്നത് 156.30 കോടി
കേവലം ഒരു ഡോളർ മാത്രം ശമ്പളം വാങ്ങുന്ന സുക്കര്‍ബര്‍ഗിന്‍റെ സുരക്ഷയ്ക്കാണ് ഇത്രയും വലിയ തുക ചെലവഴിക്കുന്നത്
ന്യൂയോര്‍ക്ക്: മാർക്ക് സുക്കർബർഗിന്‍റയും കുടുംബത്തിന്‍റെയും സുരക്ഷയ്ക്ക് ഒരു വർഷം ഏകദേശം 156.30 കോടി രൂപ ചിലവാകുന്നു എന്ന് റിപ്പോര്‍ട്ട്. 2018ലെ കണക്കാണ് ഇത്. 2017നെ വച്ച് നോക്കുമ്പോള്‍ ഈ തുക ഇരട്ടിയാണെന്നാണ് റിപ്പോർട്ട്. വെള്ളിയാഴ്ചയാണ് ഫേസ്ബുക്ക് ഇതുസംബന്ധിച്ച കണക്കുകൾ പുറത്തു വിട്ടത്.
കേവലം ഒരു ഡോളർ മാത്രം ശമ്പളം വാങ്ങുന്ന സുക്കര്‍ബര്‍ഗിന്‍റെ സുരക്ഷയ്ക്കാണ് ഇത്രയും വലിയ തുക ചെലവഴിക്കുന്നത്. ഇതിന് പുറമേ സുക്കർബർഗിന്‍റെ സ്വകാര്യ വിമാനത്തിന്‍റെ യാത്രയ്ക്കായി 2.6 ദശലക്ഷം ഡോളറും മുടക്കുന്നുണ്ട് ഫേസ്ബുക്ക്. ഇതും സുരക്ഷയുടെ ഭാഗമായാണ് ഫേസ്ബുക്ക് കണക്കാക്കുന്നത്.
സുക്കർബർഗ് കഴിഞ്ഞാൽ ഫേസ്ബുക്കില്‍ രണ്ടാംസ്ഥാനമുള്ള ചീഫ് ഓപ്പറേറ്റിങ് ഓഫിസർ ഷെറി സാൻഡ്ബർഗ് കഴിഞ്ഞ വര്‍ഷം സുരക്ഷയ്ക്കും യാത്രയ്ക്കും വാങ്ങിയത് 23.7 ദശലക്ഷം ഡോളറാണ്.
