വില 10 ലക്ഷം, വരുന്നൂ ഇന്ത്യക്കാരെ തേടി കിടിലനൊരു സ്‍കൂട്ടര്‍!
ഈ ഒക്ടോബറില്‍ സ്‍കൂട്ടറിന്‍റെ വിൽപ്പന ആരംഭിക്കാനാണ് കമ്പനിയുടെ തീരുമാനമെന്നും 10 ലക്ഷം രൂപ എക്സ്-ഷോറൂം വില പ്രതീക്ഷിക്കുന്നതായും റിപ്പോര്‍ട്ടുകള്‍
ജര്‍മ്മന്‍ ആഡംബര ഇരുചക്ര വാഹന നിര്‍മ്മാതാക്കളായ ബിഎംഡബ്ല്യു മോട്ടോറാഡിന്‍റെ ഇന്ത്യന്‍ വിപണിയിലെ പുതിയ മോഡലായ C 400 GT ഉടന്‍ വിപണിയില്‍ എത്തും. ഈ ഒക്ടോബറില്‍ സ്‍കൂട്ടറിന്‍റെ വിൽപ്പന ആരംഭിക്കാനാണ് കമ്പനിയുടെ തീരുമാനമെന്നും 10 ലക്ഷം രൂപ എക്സ്-ഷോറൂം വില പ്രതീക്ഷിക്കുന്നതായുമാണ് ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നത്.
ആഗോളതലത്തില്‍ നേരത്തെ ശ്രദ്ധേയനാണ് ഈ മാക്സി സ്‍കൂട്ടര്‍. 350 സിസി എഞ്ചിനുമായാണ് സി 400 ജിടി വരുന്നത്. ലിക്വിഡ്-കൂൾഡ്, സിംഗിൾ സിലിണ്ടർ 350 സിസി എഞ്ചിന് പുതിയ 'ഇ-ഗ്യാസ്' സംവിധാനവും നൽകിയിട്ടുണ്ട്. അപ്‌ഡേറ്റ് ചെയ്ത ത്രോട്ടിൽ-ബൈ-വയർ സിസ്റ്റമാണ് 'ഇ-ഗ്യാസ്'. പരിഷ്കരിച്ച എഞ്ചിൻ മാനേജുമെൻറ് സിസ്റ്റവും വാഹനത്തിലുണ്ട്. പുതിയ കാറ്റലിറ്റിക് കൺവെർട്ടറിനൊപ്പം ഓക്സിജൻ സെൻസറും പരിഷ്കരിച്ച സിലിണ്ടർ ഹെഡും എക്സോസ്റ്റ് സിസ്റ്റവും ഉൾപ്പെടുത്തിയിട്ടുണ്ട്. ഇത് സ്കൂട്ടറിനെ യൂറോ വി എമിഷൻ മാനദണ്ഡങ്ങളിലേക്ക് ഉയര്‍ത്തുന്നു.
7,500 ആർ‌പി‌എമ്മിൽ 33.5 ബിഎച്ച്പി കരുത്തും 5,750 ആർ‌പി‌എമ്മിൽ 35 എൻ‌എം ടോർക്കും വാഹനത്തിന് ലഭിക്കും. രണ്ട് സ്കൂട്ടറുകളിലെയും സിവിടി ഗിയർ‌ബോക്സ് അപ്‌ഡേറ്റുചെയ്‌തു. പുതിയ ക്ലച്ച് സ്പ്രിംഗുകൾ മികച്ച ത്രോട്ടിൽ പ്രതികരണത്തോടൊപ്പം സുഗമമായ പവർ ഡെലിവറിക്കും കാരണമാകും.
ബിഎംഡബ്ല്യു സി 400 ജി‌ടിയുടെ ഏറ്റവും പുതിയ അപ്‌ഡേറ്റുകളിൽ ഒരു ഓട്ടോമാറ്റിക് സ്റ്റെബിലിറ്റി കൺ‌ട്രോൾ (എ‌എസ്‌സി) സിസ്റ്റവും ഉൾപ്പെടുന്നു. 139 കിലോമീറ്ററാണ് രണ്ട് ബിഎംഡബ്ല്യു സ്‍കൂട്ടറുകളുടെയും ടോപ്പ് സ്പീഡ്. സ്റ്റൈലിംഗിന്റെ കാര്യത്തിൽ C 400 GT ഷാർപ്പ്, മസ്‌ക്കുലർ രൂപകൽപ്പനയാണ് അവതരിപ്പിക്കുന്നത്. അതിൽ ആപ്രോൺ ഘടിപ്പിച്ച ഹെഡ്‌ലൈറ്റ്, സ്പ്ലിറ്റ്-സ്റ്റൈൽ ഫുട്‌ബോർഡ്, സ്റ്റെപ്പ്-അപ്പ് സാഡിൽ, സ്‌പോർട്ടി പില്യൺ ഗ്രാബ്-റെയിലുകൾ എന്നിവ ഉൾപ്പെടുന്നു.
C 400 GT മാക്സി സ്‌കൂട്ടറിനായുള്ള അനൗദ്യോഗിക ബുക്കിംഗും കമ്പനി ഇപ്പോൾ ആരംഭിച്ചതായും റിപ്പോര്‍ട്ടുകള്‍ ഉണ്ട്. താത്പര്യമുള്ള ഉപഭോക്കാക്കൾക്ക് ഒരു ലക്ഷം രൂപ ടോക്കൺ തുകയായി നൽകി വാഹനം പ്രീ-ബുക്ക് ചെയ്യാം.
കൊവിഡ് മഹാമാരിയുടെ രണ്ടാംവരവിന്റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ച് നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona
