ഒറ്റവര്ഷത്തിനിടെ ഇന്ത്യയില് വിറ്റഴിച്ചത് 6.30 ലക്ഷം വൈദ്യുത ഓട്ടോറിക്ഷകള്
രാജ്യത്തെ നിരത്തുകളില് സമ്പൂര്ണ ഇലക്ട്രിക് വാഹനമെന്നതാണ് കേന്ദ്ര സര്ക്കാരിന്റെ സ്വപ്നം. ഈ സ്വപ്നത്തിന് കരുത്തുപകരുന്നൊരു വാര്ത്തയാണ് ഇപ്പോള് വരുന്നത്. വൈദ്യുതവാഹന വില്പ്പനയില് രാജ്യം മുന്നോട്ടെന്നാണ് വാര്ത്തകള്. അതും ഒറ്റവര്ഷത്തിനിടെ ഇന്ത്യയില് വിറ്റഴിച്ചത് 6.30 ലക്ഷം വൈദ്യുത ഓട്ടോറിക്ഷകളാണെന്നാണ് റിപ്പോര്ട്ട്. കഴിഞ്ഞ വര്ഷം ഒരെണ്ണംപോലും വിറ്റഴിക്കാതിരുന്നിടത്താണ് ഈ വര്ഷം വില്പ്പന ആറ് ലക്ഷം കടന്നതെന്നതാണ് കൗതുകം.
ഓട്ടോറിക്ഷകളായിരിക്കും രാജ്യത്തെ നിരത്തുകളില്നിന്ന് ആദ്യം ഒഴിവാകുന്ന പെട്രാള്, ഡീസല് വാഹനമെന്നാണ് റിപ്പോര്ട്ടുകള്. അതുകൊണ്ടാണ് ഇലക്ട്രിക് ഓട്ടോറിക്ഷകളുടെ ഉല്പാദനത്തിനും ഉപഭോഗത്തിനും മുന്ഗണന കിട്ടുന്നതെന്നാണ് നിരീക്ഷണം.
ഇലക്ട്രിക് ഓട്ടോറിക്ഷകളുടെ മാത്രമല്ല എല്ലാത്തരത്തിലുമുള്ള ഇലക്ട്രിക് വാഹനങ്ങളുടെ വില്പ്പനയിലും ഈ വര്ഷം വര്ധനയുണ്ടെന്നാണ് കണക്കുകള്. ഇലക്ട്രിക് വാഹനങ്ങളുടെ വില്പ്പന ആകെ 56,000ല് നിന്നും 7,59,000 ആയി ഉയര്ന്നു. അതായത് 130 ശതമാനത്തോളമാണ് വര്ധന.
2017-18 സാമ്പത്തികവര്ഷത്തില് 54,800 ഇലക്ട്രിക് ഇരുചക്രവാഹനങ്ങള് വിറ്റപ്പോള് 2018-19ല് ഇത് 1,26,000 ആയി ഉയര്ന്നു. നാലുചക്രവാഹനങ്ങള് 1200-ല് നിന്നും 3600 ആയും ഉയര്ന്നെന്നാണ് കണക്കുകള്.
