ഹൈഡ്രജൻ ഇന്ധന സെൽ പ്ലാന്റുകൾ, വന്‍ നിക്ഷേപവുമായി ഹ്യുണ്ടായി മോബിസ്
ദക്ഷിണ കൊറിയന്‍ (South Korea) വാഹന നിര്‍മ്മാതാക്കളായ ഹ്യുണ്ടായിയുടെ ഉപസ്ഥാപനം ഹ്യുണ്ടായ് മോബിസ് ( Hyundai Mobis)കൊറിയയിൽ രണ്ട് പുതിയ ഇന്ധന സെൽ പ്ലാന്റുകൾ നിർമ്മിക്കുന്നു.
ദക്ഷിണ കൊറിയന്‍ (South Korea) വാഹന നിര്‍മ്മാതാക്കളായ ഹ്യുണ്ടായിയുടെ ഉപസ്ഥാപനം ഹ്യുണ്ടായ് മോബിസ് ( Hyundai Mobis)കൊറിയയിൽ രണ്ട് പുതിയ ഇന്ധന സെൽ പ്ലാന്റുകൾ നിർമ്മിക്കുന്നു. ഇഞ്ചിയോണിലെ ചിയോങ്‌ന ഇന്റർനാഷണൽ സിറ്റിയിലെ ഇൻഡസ്ട്രിയൽ കോംപ്ലക്‌സിൽ ഹൈഡ്രജൻ ഫ്യുവൽ സെൽ സ്റ്റാക്കുകൾ നിർമ്മിക്കുന്ന പുതിയ പ്ലാന്റിന് തറക്കല്ലിടൽ ചടങ്ങ് നടത്തിയതായി ഇന്ത്യന്‍ ഓട്ടോസ് ബ്ലോഗ് റിപ്പോര്‍ട്ട് ചെയ്യുന്നു.
രണ്ട് പ്ലാന്റുകളിലായി മൊത്തം 1.1 ബില്യൺ യുഎസ് ഡോളർ നിക്ഷേപിക്കുമെന്ന് ഹ്യുണ്ടായ് മൊബിസ് പ്രഖ്യാപിച്ചു. പുതിയ പ്ലാന്റുകൾ 2023 ന്റെ രണ്ടാം പകുതിയിൽ വൻതോതിൽ ഉത്പാദനം ആരംഭിക്കും. പൂർണ്ണമായി പ്രവർത്തിക്കുമ്പോൾ, സൗകര്യങ്ങൾ ഓരോ വർഷവും 100,000 ഹൈഡ്രജൻ ഇന്ധന സെല്ലുകൾ ഉത്പാദിപ്പിക്കുമെന്ന് പ്രതീക്ഷിക്കുന്നു.
ലോകത്തിലെ ഏറ്റവും വലിയ ഇന്ധന സെൽ ഉൽപാദന ശേഷിയുള്ള ഹ്യുണ്ടായ് മോബിസ്, പുതിയ ഉൽപാദന സ്ഥലങ്ങൾ കൂട്ടിച്ചേർത്തുകൊണ്ട് ഹൈഡ്രജൻ ഇന്ധനത്തിനായുള്ള ആഗോള മത്സരത്തിൽ കൂടുതൽ ഊർജ്ജം കൈവരിക്കുമെന്ന് പ്രതീക്ഷിക്കുന്നു. അവ പൂർത്തിയായിക്കഴിഞ്ഞാൽ, ഹ്യുണ്ടായ് മൊബിസ് മൊത്തം മൂന്ന് ഫ്യുവൽ സെൽ പ്ലാന്റുകൾ പ്രവർത്തിപ്പിക്കും എന്നാണ് റിപ്പോര്‍ട്ടുകള്‍.
കൊവിഡ് -19 ഉൾപ്പെടെയുള്ള അനിശ്ചിതത്വങ്ങൾക്കിടയിലും, ആഗോള ഇന്ധന സെൽ വ്യവസായത്തിൽ വിപണിയിലെ മുൻനിര മത്സരശേഷി ഉറപ്പാക്കാൻ തങ്ങൾ ഈ വലിയ തോതിലുള്ള നിക്ഷേപം നടത്താൻ തീരുമാനിച്ചെന്നാണ് കമ്പനി പറയുന്നത്. ഹൈഡ്രജൻ വ്യവസായത്തിന്റെ വികസനത്തിനും ആവാസവ്യവസ്ഥ വിപുലീകരിക്കുന്നതിനുമായി തങ്ങൾ കൂടുതൽ സൗകര്യങ്ങൾ നിക്ഷേപിക്കുകയും ഗവേഷണ -വികസന ശേഷി ശക്തിപ്പെടുത്തുകയും ചെയ്യും എന്നും കമ്പനി വ്യക്തമാക്കുന്നു.
